Suresh Dhas Son Car Accident : अहमदनगर-पुणे महामार्गावर पारनेर तालुक्यातील सुपा शिवारात शुक्रवारी मध्यरात्री भीषण अपघाताने परिसरात खळबळ उडाली. आष्टी मतदारसंघाचे भाजप आमदार सुरेश धस यांचा मुलगा सागर धस याच्या भरधाव कारने एका दुचाकीस्वाराला जोरदार धडक दिल्याने ३४ वर्षीय व्यक्तीचा जागीच मृत्यू झाला आहे. नितीन शेळके (वय ३४, रा. पळवे खुर्द, ता. पारनेर) असं अपघातात मृत्य झालेल्या व्यक्तीचे नाव आहे.

या अपघातामुळे प्रशासकीय आणि राजकीय वर्तुळात चर्चा सुरू झाली असून, पोलिसांनी सागर धस आणि त्याच्या सहकाऱ्याला ताब्यात घेतले आहे. ही घटना शुक्रवारी रात्री ११ वाजण्याच्या सुमारास पारनेर तालुक्यातील जातेगाव घाट फाट्याजवळ घडली.

‘त्या’ रात्री काय घडलं?

नितीन शेळके हे आपल्या दुचाकीवरून जातेगाव फाट्याकडून पारनेरच्या दिशेने जात होते. यावेळी मागून भरधाव वेगात येणाऱ्या सागर धस याच्या चारचाकी वाहनाने त्यांच्या दुचाकीला जोरदार धडक दिली. धडक इतकी जबरदस्त होती की, नितीन शेळके गंभीर जखमी होऊन रस्त्यावर कोसळले. त्यांना तातडीने रुग्णालयात दाखल करण्यात आले, मात्र उपचारापूर्वीच डॉक्टरांनी त्यांना मृत घोषित केले.

अपघातावेळी सागर सुरेश धस (रा. आष्टी, जि. बीड) आणि त्याचा सहकारी सचिन दादासाहेब कोकणे (रा. तवलेवाडी, ता. आष्टी, जि. बीड) हे दोघेही चारचाकी वाहनात होते, अशी माहिती सुपा पोलिसांनी दिली आहे. सागर धस हा भाजप आमदार सुरेश धस यांचा मुलगा असल्याने या प्रकरणाने राजकीय रंग घेतला आहे.

दरम्यान, सुपा पोलिसांनी तात्काळ घटनास्थळी धाव घेतली आणि सागर धस आणि सचिन कोकणे यांना वाहनासह ताब्यात घेतले. दोघांची वैद्यकीय तपासणी करण्यात आली असून, सुपा पोलीस ठाण्यात या अपघाताची नोंद करण्यात आली आहे. पोलिसांनी या प्रकरणाचा तपास सुरू केला असून, अपघाताचे नेमके कारण आणि जबाबदारी निश्चित करण्यासाठी पुढील कारवाई सुरू आहे.

या अपघाताने नितीन शेळके यांच्या कुटुंबावर मोठा आघात झाला आहे. स्थानिकांनी या घटनेवर तीव्र नाराजी व्यक्त केली असून, रस्त्यावरील बेदरकार वाहनचालकांवर कठोर कारवाईची मागणी केली आहे. हा अपघात पुणे आणि अहमदनगर परिसरात चर्चेचा विषय बनला आहे.

कोण आहेत आमदार सुरेश धस?

बीड जिल्ह्यातील आष्टी विधानसभा मतदारसंघाचे आमदार हे सुरेश धस हे आहेत. आष्टी मतदारसंघ हा सुरेश धस यांचा बालेकिल्ला मनाला जातो. गेल्या कित्येक वर्षांपासून ते या मतदारसंघात निवडून येत आहेत. विशेषत: संतोष देशमुख हत्या प्रकरणाला विधानसभेत लावून धरण्याचे काम धस यांनी केले. तसेच त्यांनी ज्या पद्धतीने त्यांची विधानसभेत भूमिका मांडली, तेव्हापासून ते महाराष्ट्रात सर्वपरिचित झालेले आहेत.

कोण आहे सागर धस?

सागर धस हा आष्टी मतदारसंघाचे भाजपचे आमदार सुरेश धस यांचा मुलगा आहे. विधानसभा निवडणुकीदरम्यान सागर धस याने वडिलांसाठी राजकारणात सक्रिय सहभाग घेतला होता. तसेच त्याने प्रचाराची धुरा देखील सांभाळली होती.

सागरचे शिक्षण पुण्यात झालं असून आष्टी मतदारसंघात युवा नेता म्हणून सागर ओळखला जातो. मतदारसंघात सुरेश धस यांच्या अनुपस्थितीत विविध सामाजिक कार्यक्रमात सागरचा सक्रिय सहभागा पाहायला मिळतो.