नवी दिल्ली : २००१ च्या जया शेट्टी हत्या प्रकरणात गँगस्टर छोटा राजनच्या जन्मठेपेच्या शिक्षेच्या स्थगितीला आव्हान देणाऱ्या सीबीआयच्या याचिकेवर सुनावणी करण्यास सर्वोच्च न्यायालयाने संमती दिली आहे. यापूर्वी मुंबई उच्च न्यायालयाने या प्रकरणी आदेश दिला होता. त्यानंतर उच्च न्यायालयाने या प्रकरणात गँगस्टर छोटा राजनची जन्मठेपेची शिक्षा स्थगित केली होती आणि त्याला जामीन मंजूर करण्यात आला होता.

न्या. विक्रम नाथ, न्या. संजय करोल आणि न्या. संदीप मेहता या तीन न्यायाधीशांच्या खंडपीठाने या याचिकेवर विचार केला. यादरम्यान सर्वोच्च न्यायालयाने छोटा राजनलाही नोटीस बजावली आहे. छोटा राजनला चार आठवड्यांच्या आत या याचिकेचे उत्तर द्यावे लागेल. छोटा राजन आधीच क्राईम रिपोर्टर जे डे यांच्या हत्येप्रकरणी जन्मठेपेची शिक्षा भोगत आहे.

तो सध्या दिल्लीतील तिहार तुरुंगात आहे. खंडपीठाने म्हटले आहे की, याचिकेवर नोटीस जारी करावी, ज्याचे उत्तर चार आठवड्यांच्या आत द्यावे लागेल. दरम्यान, याचिकाकर्त्याचे वकील रजिस्ट्रीने दाखवलेल्या कमतरता देखील दूर करतील.

शेट्टीच्या हत्येप्रकरणी छोटा राजन दोषी

गेल्या वर्षी मे महिन्यात एका विशेष न्यायालयाने राजनला शेट्टीच्या हत्येप्रकरणी दोषी ठरवले होते. यासोबतच त्याला जन्मठेपेची शिक्षा सुनावण्यात आली. नंतर राजनने शिक्षेविरुद्ध उच्च न्यायालयात अपील दाखल केले. ज्यावर उच्च न्यायालयाने २३ ऑक्टोबर २०२४ रोजी दिलेल्या आदेशात त्याची शिक्षा स्थगित केली आणि जामीनही मंजूर केला. ज्याला केंद्रीय अन्वेषण ब्युरो (सीबीआय) ने आव्हान दिले आहे.