Pune News : शहरातील वाहतूक कोंडी फोडण्यासाठी पीएमआरडीएकडून बांधण्यात आलेल्या सावित्रीबाई फुले पुणे विद्यापीठ चौकातील उड्डाणपूलाचे उद्घाटन मुख्यमंत्री देवेंद्र फडणवीस यांनी रविवारी व्हर्च्युअली केले असले, तरी या कामाच्या दर्जाबाबत प्रश्नचिन्ह निर्माण झाले आहे. मात्र, या उड्डाणपूलाच्या कामात काही त्रुटी आणि हलगर्जीपणा दिसून येत असल्याचा आरोप करत नगरसेवक सनी विनायक निम्हण यांनी संबंधित अधिकारी आणि कंत्राटदारांवर कारवाई करण्याची मागणी केली आहे. पूल सुरू झाल्यानंतर या उड्डाणपूलाची काही छायाचित्रे समोर आली असून त्यावरून कामाच्या गुणवत्तेबाबत शंका निर्माण होत असल्याचे निम्हण यांनी म्हटले आहे. या प्रकरणाचा सखोल तांत्रिक अभ्यास केल्यानंतरच अंतिम निष्कर्ष काढता येईल. कदाचित हा मोठा स्ट्रक्चरल दोष नसेलही; मात्र उघड्या डोळ्यांनी पाहताना काम करताना हलगर्जीपणा झाल्याचे स्पष्ट दिसत असल्याचे त्यांनी नमूद केले. तसेच ज्या व्यक्तीला हा पूल समर्पित करण्यात आला आहे आणि ज्यांच्या हस्ते त्याचे उद्घाटन झाले, त्या दोघांच्या स्वभावाच्या दृष्टीने हा प्रकार अपमानास्पद असल्याचेही निम्हण यांनी म्हटले आहे. स्व. अजित पवार हे कामाच्या दर्जाबरोबरच त्याच्या सौंदर्याबाबत अत्यंत जागरूक आणि काटेकोर होते. तसेच मुख्यमंत्री देवेंद्र फडणवीस यांचाही कामाच्या गुणवत्तेबाबत तितकाच जागरूक दृष्टिकोन असल्याचे त्यांनी नमूद केले. हा दोष राजकीय नेतृत्वाचा नसून प्रशासकीय ढिसाळपणा आणि बेजबाबदारपणाचे द्योतक असल्याचा आरोप निम्हण यांनी केला. पूलाच्या उद्घाटनापूर्वी किमान अंतिम पाहणी होणे अपेक्षित होते. मात्र तेही झाले नसल्याचे दिसते. त्यामुळे या प्रकरणी जबाबदार अधिकारी आणि कंत्राटदारांवर कारवाई करावी, अशी मागणी निम्हण यांनी केली आहे. तसेच आपण एक लोकप्रतिनिधी म्हणून सरकारचा प्रतिनिधी असलो, तरी त्याआधी पुणे शहराचा जागरूक नागरिक आणि अभियंता म्हणून ही भूमिका मांडत असल्याचे त्यांनी स्पष्ट केले.
