Sunil Gavaskar Warns Team India Over Hardik Pandya Replacement and Bowling Balance : भारतीय संघाचे माजी दिग्गज फलंदाज सुनील गावस्कर यांनी स्टार अष्टपैलू हार्दिक पांड्या याच्या पर्यायावरून भारतीय संघ व्यवस्थापनाला महत्त्वाचा सल्ला दिला आहे. हार्दिकची जागा घेणे कोणालाही शक्य नसून संघाने त्याचा थेट पर्याय शोधण्याचा अट्टाहास सोडून द्यावा, असे रोखठोक मत गावस्करांनी मांडले आहे. वेस्ट इंडिजविरुद्धचा पाचवा टी-२० सामना पावसामुळे रद्द झाल्यानंतर जिओस्टारवर बोलताना गावस्करांनी महत्त्वाचा सल्ला देताना एक गंभीर इशाराही दिला.

हार्दिकची जागा कोणीही घेऊ शकत नाही; पर्यायाचा अट्टाहास नको

गावस्करांनी स्पष्ट शब्दांत सांगितले की, “आपण कधीकधी हार्दिक पंड्याचा थेट पर्याय शोधण्यात खूप जास्त अडकून पडतो. मात्र वस्तुस्थिती अशी आहे की त्याची जागा कोणीच घेऊ शकत नाही. जर तुम्हाला त्याच्या तोडीचा परिपूर्ण खेळाडू मिळत नसेल, तर अशा खेळाडूंसोबत पुढे जा जे संघासाठी वेगळ्या प्रकारची भूमिका बजावू शकतात.” त्यांनी स्पष्ट केले की तशाच प्रकारचा ऑलराउंडर शोधण्यापेक्षा उपलब्ध गुणवत्तेचा वेगळ्या रणनीतीसह वापर करणे संघासाठी अधिक फायदेशीर ठरेल.

नमन धीरचे उदाहरण; चार स्पेशालिस्ट गोलंदाज गरजेचे

गावस्करांनी युवा अष्टपैलू खेळाडू नमन धीरचे कौतुक करत त्याचे उदाहरण दिले. निर्णायक सामन्यात नमन धीरने अवघ्या ६ चेंडूंत नाबाद २४ धावांची वादळी खेळी केली होती. यावर बोलताना गावस्कर म्हणाले की, “नमन धीर सध्या हेच काम चोख बजावत आहे. तो गोलंदाजीत आपली षटके अचूक टाकतो आणि त्याची फलंदाजीही उत्तम आहे. या मालिकेतून हाच धडा मिळतो की भारताने किमान चार नियमित निष्णात गोलंदाजांसह मैदानात उतरले पाहिजे. पाचवा आणि सहावा पर्याय असे ऑलराउंडर्स असावेत जे फलंदाजीतही हातभार लावू शकतील. नमन धीर फलंदाज आहे, पण तो दोन-तीन षटके टाकू शकतो आणि अक्षर पटेल चार षटके पूर्ण करू शकतो.”

आठव्या क्रमांकापर्यंत फलंदाजीच्या नादात गोलंदाजी कमकुवत –

बॅटिंग लाईनअप वाढवण्याच्या नादात संघात होणाऱ्या चुकांवर बोट ठेवत गावस्कर म्हणाले की, “जेव्हा तुम्ही आठव्या क्रमांकापर्यंत फलंदाजी वाढवण्याचा हट्ट धरता, तेव्हा नकळतपणे तुमची मुख्य गोलंदाजी कमकुवत होते आणि नेमक्या याच कारणामुळे संघाला पराभवाचा सामना करावा लागतो.” फलंदाजीला खोली देण्यापेक्षा प्रतिस्पर्धी संघाला रोखू शकतील अशा दर्जेदार गोलंदाजांवर भर दिला पाहिजे, असे त्यांनी स्पष्ट केले.

हेही वाचा – Ishan Kishan Six : इशान किशनचा कहर; चिन्नास्वामीवर एक असा षटकार ठोकला, चेंडू थेट छतावरून बाहेर पडला, VIDEO होतोय व्हायरल

पाऊस पडल्याने गोलंदाजांची परीक्षा हुकली; फिरकीपटूंच्या पाठीशी उभे राहा –

पावसामुळे सामना अवघ्या ७.४ षटकांत थांबल्याने गावस्करांनी नाराजी व्यक्त केली. नऊ षटकांच्या या छोट्या लढतीत भारतीय गोलंदाज कसा बचाव करतात हे पाहण्याची संधी निसर्गामुळे हुकली. याशिवाय फिरकीपटूंना आत्मविश्वास देण्याची गरज व्यक्त करताना ते म्हणाले की, “हे गोलंदाज नियमितपणे प्लेइंग इलेव्हनमध्ये खेळोत किंवा न खेळोत, पण ते मोठ्या संघ रचनेचा मुख्य भाग आहेत. फिरकीपटूंना विश्वास देणे गरजेचे आहे, कारण छोट्या फॉरमॅटमध्ये त्यांचा आत्मविश्वास लवकर डळमळीत होऊ शकतो.”