Sunetra Pawar : महाराष्ट्राच्या राजकारणातील अंतर्गत कलह, बंडखोरी आणि पक्षांतराचे सत्र थांबण्याचे नाव घेत नाहीये. स्थानिक स्वराज्य संस्थांच्या निवडणुकीनंतर सुरू झालेली ही राजकीय उलथापालथ आता अधिकच तीव्र झाली आहे.

अवघ्या दोन दिवसांपूर्वी उद्धव ठाकरे यांच्या शिवसेनेच्या ६ खासदारांनी पक्षाला जय महाराष्ट्र केल्यामुळे राज्यातील राजकीय समीकरणे पूर्णपणे बदलून गेली आहेत. हे फुटीर खासदार मुख्यमंत्री एकनाथ शिंदे यांच्या ‘शिवसेनेत’ प्रवेश करण्याची दाट शक्यता वर्तवली जात आहे.

ज्यामुळे शिंदे गटाची ताकद कमालीची वाढणार असल्याचे बोलले जात आहे. ही फूट ताजी असतानाच, आता शरद पवार यांच्या राष्ट्रवादी काँग्रेसचेही काही खासदार फुटणार असल्याची जोरदार चर्चा राजकीय वर्तुळात रंगली आहे.

या सर्व घडामोडींच्या दरम्यान, आता उपमुख्यमंत्री अजित पवार आणि सुनेत्रा पवार (Sunetra Pawar) यांच्या राष्ट्रवादी काँग्रेस पक्षाला (अजित पवार गट) देखील मोठे धक्के बसण्याची शक्यता निर्माण झाली आहे. राज्यातील विधानपरिषदेच्या ११ जागांसाठी कालच मतदान पार पडले. या निवडणुकीच्या पार्श्वभूमीवर राज्यातील राजकीय घडामोडींना प्रचंड वेग आला होता.

निवडणुकीत तिकीट न मिळाल्यामुळे अनेक नेत्यांनी आधीच पक्षाची साथ (Sunetra Pawar) सोडली होती, मात्र मतदान प्रक्रिया पूर्ण झाल्यानंतरही नेत्यांमधील अंतर्गत नाराजी कायम असल्याचे पाहायला मिळत आहे. सुनेत्रा पवारांच्या राष्ट्रवादीतील काही प्रमुख नेते सध्या पक्षाच्या भूमिकेवर तीव्र नाराज असल्याची चर्चा आहे.

या नाराजीतूनच सांगलीचे माजी खासदार संजयकाका पाटील हे पुन्हा एकदा भाजपमध्ये प्रवेश करणार असल्याची पक्की माहिती समोर आली आहे. विधानसभा निवडणुकीच्या दरम्यान संजयकाका पाटील यांनी भाजप सोडून राष्ट्रवादी काँग्रेसमध्ये प्रवेश केला होता. मात्र, काही दिवसांपूर्वीच त्यांनी भाजपचे प्रदेशाध्यक्ष रवींद्र चव्हाण यांची भेट घेतली होती. सूत्रांनी दिलेल्या माहितीनुसार, संजयकाका पाटील हे येत्या ३० जून रोजी उपमुख्यमंत्री देवेंद्र फडणवीस यांच्या उपस्थितीत अधिकृतपणे भाजपमध्ये घरवापसी करणार आहेत.

संजयकाका पाटील यांच्यानंतर आता राष्ट्रवादी काँग्रेसचा आणखी एक मोठा चेहरा पक्षाची साथ सोडणार असल्याची चर्चा आहे. राष्ट्रवादीचे प्रदेश उपाध्यक्ष आणि अल्पसंख्याक समाजातील मातब्बर नेते सलीम सारंग यांच्या नाराजीने राजकीय वर्तुळात खळबळ (Sunetra Pawar) उडवून दिली आहे. सलीम सारंग यांनी सोशल मीडियावर अत्यंत सूचक अशी पोस्ट शेअर केली असून, या पोस्टमुळे ते पक्षावर नाराज असल्याच्या चर्चांना उधाण आले आहे.

सलीम सारंग हे लवकरच भाजपमध्ये प्रवेश करणार असल्याचे बोलले जात आहे. सारंग यांचा अल्पसंख्याक समाजात अत्यंत चांगला प्रभाव आणि मजबूत पकड मानली जाते. अशा परिस्थितीत त्यांनी जर राष्ट्रवादी काँग्रेसला रामराम ठोकला, तर आगामी निवडणुकांच्या तोंडावर अजित पवार गटाला अल्पसंख्याक मतदारांमध्ये फार मोठा धक्का सहन करावा लागू शकतो. एकीकडे ठाकरे आणि पवारांच्या गोटात अस्वस्थता असताना, आता सत्ताधारी राष्ट्रवादीतही सुरू झालेल्या या गळतीमुळे राज्याचे राजकारण कोणत्या दिशेला वळणार, याकडे सर्वांचे लक्ष लागले आहे.