Sunetra Pawar : दिवंगत उपमुख्यमंत्री अजित पवार यांच्या निधनानंतर राज्यातील राजकारणात महत्त्वाची भूमिका बजावणाऱ्या उपमुख्यमंत्री सुनेत्रा पवार यांच्याकडे आणखी एक मोठी जबाबदारी सोपवण्यात आली आहे. त्यांची पुणे जिल्हा शिक्षण मंडळ च्या अध्यक्षपदी आज बिनविरोध निवड करण्यात आली. मंडळाच्या सभासदांच्या उपस्थितीत झालेल्या बैठकीत त्यांची एकमताने निवड झाली. गेली सुमारे २० वर्षे या मंडळाचे अध्यक्षपद अजित पवारांकडे होते. त्यांच्या नेतृत्वाखाली ग्रामीण भागात शिक्षणाचा मोठ्या प्रमाणात विस्तार झाला. अद्ययावत शाळा इमारती उभारणे, शैक्षणिक सुविधा वाढवणे आणि एक लाखांहून अधिक विद्यार्थ्यांना गुणवत्तापूर्ण शिक्षण उपलब्ध करून देणे, अशी कामगिरी त्यांच्या कार्यकाळात झाली. अजित पवारांच्या निधनानंतर सुनेत्रा पवार यांनी उपमुख्यमंत्रीपदाची शपथ घेतली. त्यानंतर त्यांची राष्ट्रवादी काँग्रेसच्या राष्ट्रीय अध्यक्षपदी निवड झाली असून बीड आणि पुणे जिल्ह्यांच्या पालकमंत्रिपदाची जबाबदारीही त्यांच्याकडे आहे. माळेगाव सहकारी साखर कारखान्याच्या संचालकपदासह विविध संस्थांमध्ये त्यांनी यापूर्वीही जबाबदाऱ्या सांभाळल्या आहेत. अध्यक्षपद स्वीकारल्यानंतर सुनेत्रा पवार यांनी आज सकाळी प्रथमच शिक्षण मंडळाचा आढावा घेतला. विविध उपक्रमांची माहिती घेऊन भविष्यातील योजना जाणून घेतल्या. “दादांनी सुरू केलेले काम अधिक वेगाने आणि व्यापक पातळीवर पुढे नेऊ,” अशी भूमिका त्यांनी मांडली. दरम्यान, बैठकीनंतर त्या राष्ट्रवादी काँग्रेसच्या पुणे कार्यालयात जिल्हा परिषद अध्यक्ष व पंचायत समिती सभापती निवडीसंदर्भातील बैठकीस उपस्थित राहणार होत्या. मात्र अमित शहा यांच्या मुंबईतील संभाव्य दौऱ्याच्या पार्श्वभूमीवर त्या तातडीने मुंबईकडे रवाना झाल्या.
