Sujata Patil : भाजपच्या सुजाता पाटील (Sujata Patil) आणि दशरथ भगत यांची अनुक्रमे नवी मुंबई महानगरपालिकेच्या महापौर आणि उपमहापौरपदी निवड झाली आहे. सरोज रोहिदास पाटील यांनी महापौरपदासाठीचा अर्ज मागे घेतल्याने आणि आकाश बाळकृष्ण माधवी यांनी उपमहापौरपदाच्या शर्यतीतून माघार घेतल्याने त्यांची बिनविरोध निवड झाली आहे.

यापूर्वी नगरसेविका आणि महिला व बालकल्याण समितीच्या अध्यक्षा म्हणून काम केलेल्या सुजाता पाटील यांनी पक्षाच्या नेतृत्वाचे आभार मानले. स्वच्छता, आरोग्य, शिक्षण, पर्यावरण आणि वाहतूक नियोजन हे आपले मुख्य प्राधान्यक्रम राहतील, असे त्यांनी सांगितले.

१११ नगरसेवक असलेल्या नवी मुंबई महानगरपालिकेच्या निवडणुकीत भाजपने ६५ आणि शिवसेनेने ४३ जागा जिंकल्या होत्या. खासदार संजीव नाईक म्हणाले, प्रचारादरम्यान भाजप आणि शिवसेना यांच्यात निर्माण झालेले मतभेद आता संपुष्टात आले आहेत. महायुती नवी मुंबईच्या विकासासाठी एकजुटीने काम करेल. शिवसेना विरोधी पक्षात बसली तरी, मला खात्री आहे की ते विकासकामांना पाठिंबा देतील.