Suicide Attempt – पिंपरी-चिंचवड शहरात शनिवारी (दि. २५ एप्रिल) रोजी मध्यरात्री कौटुंबिक वादातून एका ३७ वर्षीय तरुणाने दापोडी येथील नदीत उडी मारून आत्महत्येचा प्रयत्न केला. मात्र, अग्निशमन दलाच्या जवानांनी वेळीच धाव घेत देवदूताप्रमाणे या तरुणाचे प्राण वाचवले. अग्‍निशामक दलाकडून ​मिळालेल्या माहितीनुसार, दीपक जगन्नाथ पाटसावने (वय ३७) असे आत्महत्येचा प्रयत्न करणाऱ्या तरुणाचे नाव आहे.

शनिवारी मध्यरात्री सव्वा बारा वाजेच्या सुमारास त्याने दापोडी येथील नदीपात्रात उडी घेतली. या घटनेची माहिती मिळताच अग्निशमन दलाचे जवान तातडीने घटनास्थळी दाखल झाले. ​रात्रीची वेळ आणि पाण्याचा अंदाज नसतानाही जवानांनी अत्यंत कौशल्याने शोधमोहीम राबवून दीपक याला सुखरूपरीत्या पाण्यातून बाहेर काढले.

अग्निशमन दलाच्या या तत्परतेमुळे एका कुटुंबाचा आधार वाचला आहे. ​नदीतून बाहेर काढल्यानंतर दीपकला तातडीने पुढील उपचारासाठी पिंपरी येथील वायसीएम रुग्णालयात दाखल करण्यात आले आहे. प्राथमिक माहितीनुसार, कौटुंबिक वादातून नैराश्यात येऊन त्याने हे टोकाचे पाऊल उचलल्याचे पोलिसांनी सांगितले. या प्रकरणाचा अधिक तपास खडकी पोलीस करत आहेत.