लोणी काळभोर : थेऊर (ता. हवेली) येथील यशवंत सहकारी साखर कारखान्याच्या अध्यक्षपदी अपेक्षेप्रमाणे सुभाष चंद्रकांत जगताप व उपाध्यक्षपदी मोरेश्वर पांडुरंग काळे यांची बिनविरोध निवड झाली.

यशवंतच्या संचालक मंडळाची निवडणुक नुकतीच पार पडली असुन, कारखान्याच्या निवडणूक अधिकारी डॉ. शितल पाटील यांच्या अध्यक्षतेखाली कारखाना स्थळावर अध्यक्ष, उपाध्यक्षपदासाठी नवनिर्वाचित संचालक मंडळाची पहिलीच बैठक पार पडली. या बैठकीत अध्यक्ष, उपाध्यक्षपदासाठी अनुक्रमे सुभाष जगताप व मोरेश्वर काळे या दोघांचेच उमेदवारी अर्ज आल्याने, पाटील यांनी यशवंतच्या अध्यक्षपदी सुभाष जगताप तर उपाध्यक्षपदी मोरेश्वर काळे यांची बिनविरोध निवड झाल्याची घोषणा केली.

यशवंतच्या संचालक मंडळाच्या २१ जागां साठी नऊ मार्च रोजी पार पडलेल्या निवडणुकीत हवेली बाजार समितीचे माजी सभापती प्रताप गायकवाड, बाजार समितीचे विद्यमान संचालक व माजी सभापती प्रकाश जगताप, बाजार समितीचे विद्यमान संचालक प्रशांत काळभोर व हवेली पंचायत समितीचे माजी सदस्य बाळासाहेब चौधरी यांच्या नेतृत्वाखालील अण्णासाहेब मगर शेतकरी विकास आघाडीने २१ पैकी तब्बल १८ जागा जिंकत एकतर्फी दणदणीत विजय प्राप्त केला होता. तर कारखान्याचे माजी उपाध्यक्ष माधव काळभोर व बाजार समितीचे विद्यमान सभापती दिलीप काळभोर यांच्या नेतृत्वाखालील अण्णासाहेब मगर रयत सहकार पॅनेलला अवघ्या तीन जागांवर समाधान मानावे लागले होते.

यावेळी माजी सभापती प्रताप गायकवाड, पॅनेल प्रमुख प्रकाश जगताप, बाजार समितीचे विद्यमान संचालक प्रशांत काळभोर व हवेली पंचायत समितीचे माजी सदस्य बाळासाहेब चौधरी, पुणे जिल्हा दूध उत्पादक संघाचे संचालक गोपाळ म्हस्के यांच्यासह कारखान्याचे नवनिर्वाचित संचालक संतोष आबासाहेब कांचन, सुनिल सुभाष कांचन, सुशांत सुनिल दरेकर, शशिकांत मुरलीधर चौधरी, विजय किसन चौधरी,

ताराचंद साहेबराव कोलते, योगेश प्रल्हाद काळभोर, मोरेश्वर पांडुरंग काळे, अमोल प्रल्हाद हरपळे, राहुल सुभाष घुले, किशोर शंकर उंद्रे, रामदास सिताराम गायकवाड, सुभाष चंद्रकांत जगताप, हेमा ​​मिलींद काळभोर, रत्नाबाई माणिक काळभोर, दिलीप नाना शिंदे, मोहन खंडेराव म्हेत्रे, कुंडलिक अर्जून थोरात, सागर अशोक काळभोर, नवनाथ तुकाराम काकडे, शामराव सोपाना कोतवाल, यांच्यासह शेतकरी सभासद मोठ्या संख्येने उपस्थित होते.