Philippines – फिलिपीन्समधील एका शाळेमध्ये एका विद्यार्थ्याने गोळीबार करून आपल्या सहकारी विद्यार्थ्याची हत्या केली आणि नंतर स्वतःवर गोळी झाडून आत्महत्या केली. या सर्व घटनेचे त्याने बॉडी कॅमच्या मदतीने लाईव्ह स्ट्रीमिंग केले होते. देशात अवघ्या दोन महिन्यांत झालेली ही शाळेतील गोळीबाराची दुसरी घटना होती.

झांबोआंगा या दक्षिणेकडील बंदर शहरातील अतेनेओ दे झांबोआंगा विद्यापीठाच्या कॅम्पसमधील हायस्कूलच्या इमारतीत गोळीबार झाल्यानंतर शेकडो विद्यार्थ्यांना बाहेर काढण्यात आले. गोळीबारात इतर दोघे जण जखमी झाले, असे पोलिसांनी सांगितले.

हल्लेखोर हा इयत्ता नववीत शिकणारा विद्यार्थी होता. त्याने वर्गासमोर बसलेल्या एका शिक्षकावर गोळी झाडली, पण ती चुकली. त्यानंतर त्याने इमारतीच्या चौथ्या मजल्यावर एका विद्यार्थ्यावर गोळी झाडली. त्यानंतर तो अंदाधुंद गोळीबार करू लागला होता.

त्यानंतर तो पाचव्या मजल्यावर गेला आणि त्याच इमारतीवरून उडी मारून आत्महत्या केली, असे गृहमंत्री जॉनविक रेमुल्ला यांनी पत्रकारांना सांगितले.

मात्र या विद्यार्थ्याने स्वतःवर गोळी झाडून आत्महत्या केली असे झांबोआंगा शहराचे महापौर खैमर अदान ओलासो आणि पोलिसांनी सांगितले. या गोळीबारामागे सोशल मीडियावरील गेमिंगचा टास्क असण्याचा संशय आहे. त्यादृष्टीने संशयिताची पार्श्‍वभुमी तपासली जात आहे.