Operation Sindoor – ऑपरेशन सिंदूर विरोधात सोशल मीडियावर पोस्ट केल्याबद्दल १९ वर्षीय विद्यार्थिनीविरुद्धचा खटला केवळ पोस्ट डिलीट केल्यामुळे आणि त्याबद्दल माफी मागितल्याच्या कारणावरून खटला रद्द करता येणार नाही, अशी टिप्पणी मुंबई उच्च न्यायालयाने केली. मुख्य न्यायाधीश चंद्रशेखर आणि न्या. गौतम अंखड यांच्या खंडपीठाने म्हटले की, आरोपी हुशार विद्यार्थीनी आहे आणि तिने उत्कृष्ट कामगिरीने परीक्षा उत्तीर्ण केल्यामुळे तिच्याविरुद्ध दाखल केलेला एफआयआर रद्द करता येत नाही. ऑपरेशन सिंदूर दरम्यान भारत-पाक शत्रुत्वावर सोशल मीडियावर पोस्ट केल्याबद्दल मे महिन्यात तिच्याविरुद्ध दाखल केलेला एफआयआर रद्द करण्याची मागणी करणाऱ्या पुण्यातील एका कॉलेजियनने दाखल केलेल्या याचिकेवर न्यायालय सुनावणी करत होते. खंडपीठाने म्हटले की, केवळ ती एक हुशार विद्यार्थिनी आहे म्हणून एफआयआर रद्द करण्याचा आधार असू शकत नाही. मुलीच्या वकिलांनी असे म्हटले की तिचा पोस्ट मागे कोणताही वाईट हेतू नव्हता आणि तिने ती लगेचच डिलीट केली आणि माफी मागितली. तथापि, न्यायालयाने असे नमूद केले की पोस्ट डिलीट केल्याने खरं तर केस आणखी बिघडते आणि गुंतागुंतीची होते. खंडपीठाने दोन आठवड्यांनंतर प्रकरण पुढील सुनावणीसाठी घेण्याचे निर्देश दिले.
