खडकवासला धरण परिसरात पोलिसांचा कडक बंदोबस्त आणि नाकाबंदी

पुणे – पावसाळ्यात शनिवार-रविवारसह इतर दिवशी पर्यटकांची पावलं धरणांकडे वळतात. मात्र, करोनाच्या पार्श्वभूमीवर पुणे जिल्ह्यातील पर्यटन स्थळे धरणाचा परिसर गड किल्ले इत्यादी ठिकाणी पर्यटकांना जाण्यास बंदी आहे. शनिवार रविवार विकेंड लॉक डाऊन आणि संचार बंदी असूनही नागरिकांनी बेफिकीरपणे खडकवासला धरण परिसरात गर्दी केली होती. 

त्याच पर्यटकांवर आता शहर पोलिसांनी कारवाई करण्यास सुरुवात केली आहे. पर्यटन स्थळांकडे जाणाऱ्या मार्गावर नाकाबंदी करून पोलिसांकडून आता तपासणी सुरु करण्यात आली आहे.

पर्यटन स्थळांकडे जाणारे मार्ग पोलिसांनी बॅरिकेड्स लावून बंद केलेले आहेत. नागरिकांना तपासूनच पुढे सोडण्यात येत आहे. पर्यटनाला आले असल्यास त्यांना पुन्हा माघारी पाठवण्यात येत आहे. तसेच नियम मोडून येणाऱ्या पर्यटकांवर दंडात्मक कारवाई करण्यात आली आहे