Ujjain News – मध्य प्रदेशमधील उज्जैनमध्ये 2028 मध्ये होणाऱ्या सिंहस्थ कुंभमेळ्याची तयारी आतापासूनच सुरू झाली आहे. या पार्श्वभूमीवर सोमवारी शाही मशिदीचा काही भाग पाडल्याचे निमित्त झाले आणि शहरात दगडफेक होऊन तणाव निर्माण झाला आहे.

यावेळी दगडफेक करून दंगल सुरू करणाऱ्या दंगलखोरांना नियंत्रणात आणण्यासाठी पोलिसांनी लाठीचार्ज केला. या प्रकरणात पाच जणांचा अटक करण्यात आली असून १० जणांविरुद्ध गुन्‍हा दाखल करण्यात आले आहेत.

उज्जैन शहरातील कांथल चौकापासून गोपाल मंदिरापर्यंतचा रस्ता रुंदीकरणाचे काम केले जाणार आहे. हा मार्ग महाकालेश्वर मंदिर, गोपाल मंदिर आणि शिप्रा नदी काठाला जोडतो.

सिंहस्थ कुंभमेळा आणि धार्मिक उपक्रमांसाठी भाविकांचे मार्गाक्रमन सोपे व्हावे यासाठी रस्ता रुंदीकरण केले जात आहे. त्यासाठी शाही मशिदीपासून 10 फुटांचा अडथळा दूर करावा लागणार आहे.

यासाठी प्रशासन आणि मुस्लीम समाजात सोमवारी सकाळी चर्चा झाली. त्यानंतर मुस्लीम समाजातील सदस्य स्वतःहून अडथळा दूर करण्यासाठी पुढे आले.

मात्र, बैठकीदरम्यान घोषणाबाजी करण्यात आली आणि काही सदस्यांनी या कारवाईचा निषेध केला. यानंतर प्रशासनातील अधिकारी मार्गातील अडथळा दूर करण्यासाठी गेले तेव्हा दंगलखोर आणि पोलिसांमध्ये संघर्ष झाला.

घोषणाबाजी आणि दगडफेक झाली. त्यामुळे पोलिसांनी लाठीचार्ज केला तसेच जमाव पांगवण्यासाठी अश्रुधुराच्या नळकांड्या फेकल्या.