Stock Market crash: भारतीय शेअर बाजारात आज १९ फेब्रुवारी रोजी मोठी पडझड पाहायला मिळाली. सलग तीन दिवसांच्या तेजीनंतर नफेखोरी आणि जागतिक तणावामुळे बाजाराने जोरदार डुबकी घेतली. दिवसाअखेर बीएसई (BSE) सेन्सेक्स १२३६.११ अंकांच्या (१.४८%) घसरणीसह ८२,४९८.१४ वर बंद झाला, तर निफ्टी ३६५ अंकांनी (१.४१%) घसरून २५,४५४.३५ च्या पातळीवर स्थिरावला. या घसरणीमुळे गुंतवणूकदारांचे एकाच दिवसात सुमारे ७.५७ लाख कोटी रुपयांचे नुकसान झाले आहे. सर्वच क्षेत्रांत लाल निशाण – आजच्या व्यवहारात बाजारातील सर्वच सेक्टोरल इंडेक्समध्ये घसरण नोंदवण्यात आली. विशेषतः रिअल्टी, पॉवर, ऑटो आणि युटिलिटी शेअर्समध्ये मोठी विक्री दिसून आली. सेन्सेक्समधील सर्व ३० शेअर्स तोट्यात बंद झाले. यामध्ये इंडिगो (Indigo) ३.२३ टक्क्यांच्या घसरणीसह टॉप लूझर ठरला. त्यापाठोपाठ एम अँड एम, अल्ट्राटेक सिमेंट, ट्रेंट आणि भारत इलेक्ट्रॉनिक्सच्या शेअर्समध्ये २.७० ते २.९७ टक्क्यांपर्यंत घसरण झाली. ४,३६७ शेअर्समध्ये व्यवहार – बाजारात जरी मोठी घसरण झाली असली, तरी बीएसईवर एकूण ४,३६७ शेअर्समध्ये व्यवहार झाला. त्यापैकी २,२४३ शेअर्स वधारले, तर १,९५२ शेअर्समध्ये घसरण झाली. १८८ शेअर्सच्या भावात कोणताही बदल झाला नाही. विशेष म्हणजे, ११० शेअर्सनी ५२ आठवड्यांचा उच्चांक गाठला, तर १४६ शेअर्सनी नीचांकी पातळी गाठली. stock market हेही वाचा – मंत्रालयात लाच घेण्याचा ‘कोडवर्ड’; एक लाईन म्हणजे 50 हजार! झिरवळांच्या PAवर गंभीर आरोप बाजार कोसळण्याची ५ मुख्य कारणे – १. अमेरिका-इराण तणाव: अमेरिका आणि इराणमधील वाढत्या भू-राजकीय तणावामुळे गुंतवणूकदार सावध झाले आहेत. इराणवर संभाव्य कारवाईच्या बातम्यांमुळे जागतिक बाजारात भीतीचे वातावरण आहे. २. नफेखोरीचा दबाव: गेल्या तीन सत्रांत सेन्सेक्स-निफ्टीमध्ये १.४% ची वाढ झाली होती. उच्च स्तरावर पोहोचल्यानंतर गुंतवणूकदारांनी आज नफा वसुली (Profit Booking) करण्याला प्राधान्य दिले. ३. कच्च्या तेलाचे दर: आखाती देशांतील तणावामुळे कच्च्या तेलाचा पुरवठा विस्कळीत होण्याची शक्यता आहे. ब्रेंट क्रूड ७० डॉलरच्या आसपास असून वाढत्या किमतींमुळे भारतासारख्या आयातदार देशाची चिंता वाढली आहे. ४. इंडिया VIX मध्ये वाढ: बाजारातील अस्थिरता दर्शवणारा ‘इंडिया VIX’ इंडेक्स ५ टक्क्यांनी वाढून १२.८३ वर पोहोचला आहे. हे येणाऱ्या काळात बाजारात चढ-उतार कायम राहण्याचे संकेत आहेत. ५. बँकिंग शेअर्समध्ये विक्री: कोटक महिंद्रा बँक, ॲक्सिस बँक आणि इंडसइंड बँक यांसारख्या दिग्गज बँकांच्या शेअर्समध्ये १% ते १.८% ची घसरण झाल्याने बाजारावर दबाव वाढला. हेही वाचा – बिहारमध्ये राजकीय भूकंप! निवडणूक गैरप्रकाराच्या आरोपावरून विधानसभा अध्यक्षांसह 42 आमदारांना हायकोर्टाची नोटीस तज्ज्ञांचे काय आहे मत? बोनान्झाचे टेक्निकल ॲनालिस्ट द्रमिल विथलानी यांच्या मते, “ही घसरण केवळ नफेखोरीमुळे आहे, ट्रेंड अद्याप बदललेला नाही. जोपर्यंत निफ्टी २५,१५० च्या वर आहे, तोपर्यंत पुन्हा २६,००० ते २६,२०० पर्यंत रिकव्हरीची शक्यता आहे. मात्र, जर २५,१५० चा सपोर्ट तुटला, तर निफ्टी २४,८०० पर्यंत खाली येऊ शकतो.”
