Satara: प्रारुप मतदारयादीत नाव समाविष्ट न झालेल्या पात्र नागरिकांसह नवमतदारांना मतदारयादीत नोंदणीची संधी उपलब्ध करुन देण्यात आली आहे. भारत निवडणूक आयोगाच्या विशेष सखोल पुनरीक्षण कार्यक्रमांतर्गत जिल्ह्यातील सर्व मतदान केंद्रांवर १९, २०, २६ आणि २७ सप्टेंबर रोजी विशेष मतदार नोंदणी शिबिरे घेण्यात येणार आहेत. या दिवशी सकाळी १० ते सायंकाळी ६ या वेळेत मतदान केंद्रस्तरीय अधिकारी (बीएलओ) नागरिकांच्या सेवेसाठी उपस्थित राहणार आहेत.

विशेष सखोल पुनरीक्षणानंतर प्रसिद्ध झालेल्या प्रारुप मतदारयादीत विविध कारणांमुळे काही पात्र नागरिकांची नावे समाविष्ट झालेली नाहीत. गैरहजर, स्थलांतरित किंवा अन्य कारणांमुळे नाव राहून गेलेल्या नागरिकांना त्यांच्या सध्याच्या सर्वसाधारण रहिवासाच्या ठिकाणाहून मतदारयादीत नाव नोंदविण्याची संधी देण्यात आली आहे. दि. १ ऑक्टोबर रोजी किंवा त्यापूर्वी १८ वर्षे पूर्ण करणाऱ्या नवमतदारांनाही या कालावधीत नोंदणी करता येणार आहे. त्याचबरोबर मतदार यादीतील नाव, पत्ता किंवा अन्य तपशीलात दुरुस्ती करण्यासाठी तसेच आवश्यकतेनुसार नाव वगळण्यासंदर्भातील अर्जही स्वीकारले जाणार आहेत.

महिला, दिव्यांग, तृतीयपंथी, अल्पसंख्याक आणि अन्य पात्र नागरिकांचा मतदार यादीतील सहभाग वाढविण्यावरही विशेष भर देण्यात येणार आहे. नागरिकांनी विशेष शिबिरात जाताना आवश्यक कागदपत्रे सोबत आणावीत आणि प्रथम मतदारयादीत आपले नाव तपासावे, असे आवाहन करण्यात आले आहे. विशेष शिबिरांचा जास्तीत जास्त पात्र नागरिकांनी लाभ घेऊन मतदारयादीतील आपली नोंदणी सुनिश्‍चित करावी, असे आवाहन उपजिल्हा निवडणूक अधिकारी भगवान कांबळे यांनी केले आहे.