पुणे : शिवाजीनगर येथील जिल्हा व सत्र न्यायालय आणि कौटुंबिक न्यायालयाला जोडणारा भुयारी मार्ग ४ वर्षांपासून बंद आहे. हा भुयारी मार्ग त्वरित सुरू करावा, अशा मागणीचे निवेदन जिल्ह्यातील वकिलांची शिखर संघटना असलेल्या पुणे बार असोसिएशनने महापालिका आयुक्त नवल किशोर राम यांना दिले आहे.

यावेळी पुणे बार असोसिएशनचे अध्यक्ष अॅड. हेमंत झंजाड, सचिव अॅड. पृथ्वीराज थोरात, महापालिका स्थायी समितीचे माजी अध्यक्ष अॅड. नीलेश निकम उपस्थित होते. दरम्यान हा मार्ग लवकरच सुरू करण्याचे आश्वासन आयुक्तांनी दिले आहे.

महापालिकेच्या २०१०-११ च्या अंदाजपत्रकात या भुयारी मार्गासाठी तत्कालीन स्थायी समितीचे अध्यक्ष अॅड. नीलेश निकम यांनी दीड कोटी रुपयांची तुरतुद केली होती. त्यानुसार तयार झालेल्या या भुर्यारी मार्गाचे २०१७-१८ मध्ये उदघाटन झाले. काही वर्षे हा मार्ग चालूच होता. याचा फायदा विशेष करून वकील वर्गाला होत होता.

मात्र, मेट्रोच्या कामामुळे २०२१ पासून हा भुयारी मार्ग बंद आहे. त्यामुळे शिवाजीनगर न्यायालयाच्या ४ क्रमांच्या प्रवेशद्वाराजवळून वकिलांना फिरून कौटुंबिक न्यायालयात जात आहे. त्यामुळे वकील, सामान्य पक्षकारांची गैरसोय होत आहे. हा मार्ग त्वरित सुरू करण्याची मागणी केल्याचे अॅड. झंजाड यांनी सांगितले.