वाघोली – वाघोली येथील गायरान जमिन गट नं. १११९ व ११२३ मधील एकूण ३.५ एकर जागेमध्ये सिव्हिल हॉस्पीटल व ट्रामा सेंटर सुरु करण्याची मागणी माजी जिल्हा परिषद सदस्य रामभाऊ दाभाडे यांनी राज्याचे आरोग्य मंत्री तानाजी सावंत यांच्याकडे लेखी निवेदनाद्वारे केली आहे.

याबाबत रामभाऊ दाभाडे यांनी सांगितले की, ग्रामपंचायत वाघोलीने ग्रामसचिवालय बांधकामासाठी वाघोली येथील गायरान जमिन गट नं. १११९ व ११२३ मधील एकुण ३.५ एकर जागा महाराष्ट्र शासनाकडुन मुख्य कार्यराकी अधिकारी जिल्हा परिषद पुणे यांचे नावे वर्ग करुन घेतली होती. परंतु वाघोली गावचा दिनांक ३०/०६/२०२१ रोजी पुणे महानगर पालिकेमध्ये समावेश झाला आहे. सदर जागेचा ७/१२ मा. मुख्य कार्यकारी अधिकारी जिल्हा परिषद यांचे नावे असल्याने सदर जागा पुणे महानगर पालिकेकडे वर्ग झालेली नाही.

वाघोली हे गाव पुणे-नगर रस्त्यावरील मुख्य गाव आहे. वाघोली गावाची आज रोजीची लोकसंख्या २ ते २.५ लाख इतकी आहे. तसेच वाघोली व पुणे शहराच्या पुर्व भागामध्ये २५ गावे आहेत. या गावामध्ये सर्व प्रकारच्या सोयी असणारे कोणतेही शासकीय मोठे रुग्णालय नाही. त्यामुळे वाघोली पासुन लोणीकंद, शिक्रापुर, शिरुर ते नगरपर्यंत सर्व रुग्णांना उपचारासाठी पुणे येथील सिव्हिल हॉस्पीटल मध्ये जावे लागत आहे.

या सर्व रुग्णांना पुण्यामध्ये जाणेसाठी वाघोली मधूनच जावे लागते. परंतु दिवसेंदिवस वाघोलीपासुन पुणे शहरामधील वाढत असणारी गर्दी व त्यामुळे होणारी वाहतुक कोंडीमुळे कित्येक रुग्णांना वेळेमध्ये उपचार मिळत नाही. वाघोली येथील मुख्य कार्यकारी अधिकारी जिल्हा परिषद पुणे यांचे मालकीची गायरान जमिन गट नं. १११९ व ११२३ मधील पुणे नगर रस्त्यावरील केसनंद फाटा या ठिकाणचे एकुण ३.५ एकर क्षेत्रामध्ये वाघोली व परिसरामधील लोकांसाठी सिव्हिल हॉस्पीटल व ट्रामा सेंटर सुरु केल्यास निश्चितपणे वाघोलीसह पुर्व भागामधील २५ गावे व नगर महामार्गाद्वारे पुण्यामध्ये येणा-या सर्वच रुग्णांसाठी याचा फायदा होणार असल्याचे दाभाडे यांनी सांगितले.

पुणे शहराच्या हद्दीमध्ये पुणे-नगर रस्त्यावर ग्रामीण भागाजवळ व मुख्य महामार्गावर अशी कोणतीही जागा सध्यपरिस्थितीत उपलब्ध नसल्याने उपलब्ध असलेल्या या एकमेव जागेचा ग्रामीण भागामधील जनतेच्या आरोग्यासाठी उपयोग होणेकरीता सर्व सोयीयुक्त सिव्हिल हॉस्पीटल व ट्रामा सेंटर होणेसाठी माजी जिल्हा परिषद रामभाऊ दाभाडे, माजी उपसरपंच महेंद्र भाडळे, संतोष देशमुख आदींनी आरोग्य मंत्री यांना निवेदन दिले आहे.