Nevasa : अहिल्यानगर येथील सिव्हील हॉस्पिटलमध्ये उपचारासाठी दाखल असलेले नेवासा तालुक्यातील भेंडा खुर्द येथील साहेबराव जमन मापारी (वय ४९) हे बेपत्ता झाले आहेत. त्यांना अज्ञात व्यक्तीने पळवून नेल्याची शंका व्यक्त करत त्यांचा मुलगा प्रदीप मापारी यांनी तोफखाना पोलीस ठाण्यात तक्रार दाखल केली आहे.

मिळालेल्या माहितीनुसार, १२ नोव्हेंबर रोजी श्वास घेण्यास त्रास होत असल्याने साहेबराव यांना सिव्हील हॉस्पिटलमधील ११ क्रमांकाच्या वॉर्डमध्ये दाखल करण्यात आले होते. १४ नोव्हेंबर रोजी सकाळी ६ ते ७ वाजण्याच्या दरम्यान ते कोणालाही न सांगता रुग्णालयातून निघून गेले. कुटुंबीयांनी नातेवाईकांकडे शोध घेतला; मात्र त्यांचा ठावठिकाणा लागला नाही.

साहेबराव यांचा रंग सावळा, बांधा मजबूत असून त्यांनी खाकी रंगाचा शर्ट आणि निळी पँट घातली आहे. त्यांची उंची सुमारे पाच फूट पाच इंच आहे.

या प्रकरणी तोफखाना पोलिसांनी तक्रारीच्या आधारे गुन्हा दाखल केला असून पुढील तपास सुरू आहे. त्यांच्याबाबत माहिती मिळाल्यास तोफखाना पोलिसांशी संपर्क साधण्याचे आवाहन करण्यात आले आहे.