Fake Kidnapping – प्रेमासाठी कोणत्याही थराला जाण्याची प्रेमवीरांची तयारी असते, याचे आणखी एक उदाहारण समोर आले आहे. प्रेयसीला देण्यासाठी आणि स्वतःच्या खर्चासाठी पाच लाख हवे असल्याने उत्तर प्रदेशातील १९ वर्षीय तरुणाने स्वतःच्याच अपहरणाचा बनाव रचल्याचा प्रकार पुण्यात उघडकीस आला. मोठ्या भावाकडून पाच लाख रुपये उकळण्यासाठी आपण अपहरणकर्त्यांच्या ताब्यात असल्याचे भासवत कुटुंबीयांचा विश्वास बसावा यासाठी ढसाढसा रडतानाचे व्हिडिओही त्याने पाठवले.

उत्तर प्रदेश पोलिसांनी पुणे पोलिसांशी संपर्क साधल्यानंतर पोलिसांनी तांत्रिक तपासाच्या आधारे अवघ्या काही तासांत हा किडनॅपिंग ड्रामा उघडकीस आणला. खडकीतील क्राउन प्लाझा लॉजिंगमध्ये तरुणाला पोलिसांनी ताब्यात घेतले. ओम प्रकाश गौरीशंकर ( १९, रा. बांदा, उत्तर प्रदेश) असे तरुणाचे नाव असून तो अग्निवीर भरतीच्या वैद्यकीय चाचणीसाठी पुण्यात आला होता. प्रेयसीला देण्यासाठी त्याला दीड लाख तसेच स्वतःच्या खर्चासाठी पैशांची गरज होती.

एवढी रक्कम स्वतःकडे नसल्याने त्याने मोठ्या भावाकडून पैसे उकळण्याचा कट रचला. गौरीशंकरने कुटुंबीयांना, भावाला आपण अपहरणकर्त्यांच्या ताब्यात असून सुटकेसाठी पाच लाख रुपये द्यावे लागतील, असे सांगितले. कुटुंबीयांचा विश्‍वास बसावा म्हणून आपला रडतानाचा व्हिडिओ पाठवला. यात तो घाबरलेला असल्याचे भासवत असल्याने कुटुंबीयांचा विश्‍वास बसला. कुटुंबीयांनी शाहजहांपुर पोलिसांकडे धाव घेत अपहरणकर्ते पाच लाख मागत असल्याची माहिती दिली.

त्यांनी पुणे पोलीसांशी संपर्क साधल्यावर मध्यरात्रीपासून पहाटेपर्यंत विविध पोलिस ठाण्यांचे अधिकारी, कर्मचारी तपास करत होते. मोबाइल क्रमांकाच्या आधारे बंडगार्डन पोलिसांनी तपास केल्यावर तो खडकी परिसरात असल्याचे स्पष्ट झाले. पोलिसांनी क्राउन प्लाझा लॉजिंग गाठले तेव्हा अपहरणकर्ते नाही तर खुद्द गौरीशंकर आढळला. या कारवाईत बंडगार्डन पोलीस ठाण्याचे पोलीस उपनिरीक्षक राहुल पवार, सहायक उपनिरीक्षक प्रवीण शितोळे, हवालदार प्रकाश आव्हाड, अंमलदार ज्ञानेश्वर बडे, मनोज भोकरे, माऊली गायकवाड, महेश जाधव यांनी भाग घेतला.