प्रभात वृत्तसेवा
इंदापूर – पश्चिम महाराष्ट्राचे प्रवेशद्वार म्हणून ओळखल्या जाणार्‍या इंदापूर शहरातील बस स्थानकावर शनिवारी (दि. 25) मध्यरात्रीच्या सुमारास उभ्या असलेल्या एसटी बसला अचानक आग लागल्याची धक्कादायक घटना घडली. काही क्षणांतच आग भडकली आणि संपूर्ण बस जळून खाक झाली. सुदैवाने कोणतीही जीवितहानी झाली नाही, मात्र बसमधील प्रवाशांचे साहित्य जळून खाक झाले आहे.इंदापूर बसस्थानकात धाराशिव-पुणे मार्गावरील एसटी बस (एमएच 20 बीएल 4233) शनिवारी उशिरा आली होती.

सुमारे रात्री दोनच्या सुमारास या बसला अचानक आग लागली. सुरुवातीला कोणाच्याही लक्षात न आल्याने आग वेगाने पसरली; मात्र, काही प्रवाशांना बसच्या इंजिनखाली धूर व ज्वाळा दिसल्यावर त्यांनी आरडाओरड करत इतरांना सावध केले.बसचालक नेताजी शितोळे व वाहक कृष्णा कांबळे यांनी तत्परता दाखवत सर्व प्रवाशांना तात्काळ बसमधून बाहेर पडण्याचे आवाहन केले. त्यांच्या चातुर्यामुळे सर्व प्रवासी सुखरूपपणे बाहेर पडले. तेव्हा बसमध्ये जवळपास 50 प्रवासी होते.

काही क्षणांतच आग एवढी भडकली की बस पूर्णतः जळून गेली.बसस्थानक प्रशासनाने अग्निशामक दलाला कळवले; परंतु ते घटनास्थळी पोहोचण्यापूर्वीच बस भस्मसात झाली होती. प्रारंभिक अंदाजानुसार इंधन गळतीमुळे आग लागली असावी, अशी शक्यता व्यक्त केली जात आहे. या घटनेत प्रवाशांनी चालक आणि वाहक यांच्या दक्षतेचे मनापासून कौतुक केले. त्यांच्या त्वरित कृतीमुळे मोठी दुर्घटना टळली, असे प्रत्यक्षदर्शी प्रवाशांनी सांगितले.

सेफ्टी यंत्रणा नसल्याने वाढला नुकसानीचा धोका..
इंदापूर आगार हे जिल्ह्यातील प्रमुख बसस्थानकांपैकी एक असून, येथे दररोज शेकडो लांब पल्ल्याच्या बस थांबतात. मात्र, येथे आवश्यक त्या अग्निशामक सुरक्षा यंत्रणा आणि सेफ्टी उपकरणांचा पूर्ण अभाव असल्याची बाब पुन्हा एकदा उघड झाली आहे. जर बसस्थानकात योग्य अग्निशामक साधने उपलब्ध असती, तर बस पूर्णपणे जळून खाक झाली नसती, अशी प्रतिक्रिया प्रवाशांनी दिली आहे.