मुंबई – भारतीय क्रिकेट संघाचा माजी क्रिकेटर वेगवान गोलंदाज ‘एस. श्रीसंत’ त्याच्या वादग्रस्त कारकिर्दीमुळे नेहमीच चर्चेत राहिला आहे. दरम्यान गेल्या काही काळापासून श्रीसंत चित्रपट सृष्टीत आपले स्थान मिळवण्याचा प्रयत्न करत आहे. आता श्रीसंत अभिनयासाठी सज्ज झाला असून, लवकरच तो एका बिग बजेट चित्रपटात झळकणार आहे.

श्रीसंतच्या या आगामी चित्रपटात अभिनेत्री नयनतारा आणि अभिनेत्री सामंथा मुख्य भूमिकेत असणार आहे. ‘काथुवाकुला रेंडू काधल’ असं या चित्रपटाचं नाव असून, यामध्ये श्रीसंत अभिनेत्री सामंथाच्या बॉयफ्रेंडच्या भूमिकेत दिसणार आहे. प्रेक्षकांना चित्रपटात श्रीसंत आणि समंथा यांची रोमँटिक केमेस्ट्री पाहायला मिळणार आहे.

‘काथुवाकुला रेंडू काधल’ चित्रपटात श्रीसंत मोहम्मद मोबी नावाची मुख्य भूमिका साकारणार आहे. या चित्रपटाचे दिग्दर्शन विग्नेश शिवन करत आहेत. नुकतंच या चित्रपटातील सामंथा आणि विजय सेतुपती यांचे ‘दिप्पम दप्पम’ हे गाणं प्रदर्शित करण्यात आलं आहे. हा चित्रपट येत्या २८ एप्रिलला रुपेरी पडद्यावर रिलीज होणार आहे.