SPPU SET Exam – सावित्रीबाई फुले पुणे विद्यापीठातर्फे सहायक प्राध्यापक पदासाठी राज्यस्तरीय पात्रता परीक्षा (सेट) येत्या २६ जुलैला घेण्यात येणार आहे. विद्यापीठाला वर्षानंतर सेट परीक्षा घेण्यासाठी मुहुर्त सापडला आहे. विद्यापीठाने गेल्या १५ जून २०२५ रोजी सेटची परीक्षा घेतली होती. त्यानंतर सेटची परीक्षाच घेण्यात आली नव्हती. वर्षभरात किमान दोन वेळा सेट परीक्षा घेणे आवश्यक आहे.

त्यानंतर आतता ४१ वी सेट परीक्षा होत आहे. ही परीक्षा मुंबई, पुणे, कोल्हापूर, सोलापूर, अहिल्यानगर, नाशिक, धुळे, जळगांव, छत्रपती संभाजीनगर, नांदेड, अमरावती, नागपूर, चंद्रपूर, गडचिरोली, रत्नागिरी, परभणी, नंदुरबार व पणजी (गोवा) या केंद्रांवर होईल. परीक्षा अर्ज ऑनलाईन पध्दतीने विद्यापीठाच्या संकेतस्थळावर २ ते १६ जून दरम्यान भरता येतील.

विद्यार्थी एखाद्या विषयात आधीच सेट परीक्षा उत्तीर्ण असेल तर त्याला परत त्याच विषयात सेट परीक्षा देता येणार नाही. सेट परीक्षेचे शुल्क भरलेल्या विद्यार्थ्यांची यादी विद्यापीठाच्या संकेतस्थळावर साधारणतः जुलै महिन्याच्या दुसऱ्या आठवड्‌यात प्रसिद्ध करण्यात येईल. परीक्षा शुल्क भरूनही विद्यार्थ्यांचे नाव यादीत समाविष्ट नसेल अशा विद्यार्थ्यांना शुल्क अदा केल्याचा पुरावा विद्यापीठाला ई-मेल आयडीवर पाठवावा लागणार आहे.