SPPU Results – सावित्रीबाई फुले पुणे विद्यापीठात राष्ट्रीय शैक्षणिक धोरणांतर्गत विद्यार्थ्यांना अनिवार्य असलेल्या सहअभ्यासक्रमाचा सिलॅबस उपलब्ध नसल्याने आणि पर्यायाने त्याच्या अंतर्गत मूल्यमापनाअभावी अनेक अभ्यासक्रमांचे निकाल रखडल्याची धक्कादायक माहिती समोर आली आहे. निकालास विलंब होत असल्याच्या पार्श्वभूमीवर विद्यापीठाने सहअभ्यासकमांचे गुणांकन पुढच्या सत्रात करण्याचा निर्णय घेतल्याने निकालाचा तिढा सुटला असून, उद्या (शनिवार) पर्यंत सर्व प्रलंबित निकाल जाहीर होणार आहेत. त्यामुळे विद्यार्थ्यांना मोठा दिलासा मिळत आहे. ‘दै. प्रभात’च्या वृत्ताची दखल विद्यापीठाने हिवाळी सत्राचे निकाल जाहीर न करताच ४ एप्रिलपासून उन्हाळी परीक्षांचे वेळापत्रक जाहीर केले होते. या गोंधळावर निकाल लागण्याआधीच उन्हाळी परीक्षांचा घाट असे वृत्त प्रसिद्ध करून दै. प्रभातने प्रशासनाचे लक्ष वेधले होते. या वृत्ताची दखल घेत विद्यापीठ यंत्रणा तातडीने कामाला लागली आणि रखडलेल्या निकालांचा मार्ग मोकळा झाला. नेमका गोंधळ काय होता? नवीन शैक्षणिक धोरणानुसार विद्यार्थ्यांना सामाजिक जाणिवेसाठी कम्युनिटी कनेक्ट किंवा सहअभ्यासक्रम अनिवार्य करण्यात आला आहे. यामध्ये ग्रामीण विकास, पर्यावरण संरक्षण किंवा आरोग्य शिबिरे यांसारख्या उपक्रमांचा समावेश आहे. मात्र, या दोन क्रेडिट्सच्या अभ्यासक्रमाचा सिलॅबस तयार नसल्याने त्याचे गुण परीक्षा विभागाला मिळाले नाहीत. त्यामुळे निकाल अंतिम करता येत नव्हते. यामुळे प्रथम वर्ष बीए, बीकॉम आणि द्वितीय वर्ष बीएससी यांसारख्या प्रमुख शाखांचे निकाल गेल्या दोन-तीन महिन्यांपासून रखडले आहेत. याबाबत टीका झाल्यानंतर सहअभ्यासक्रमाचे मूल्यमापन पुढील सत्रात करण्याचा निर्णय घेतला. यामुळे निकालातील तांत्रिक अडथळा दूर झाला आहे. “महाविद्यालये व विद्यापीठ विभागांचे हिवाळी सत्र 2025 परीक्षेचे जे निकाल मूल्यमापन केंद्रामार्फत प्राप्त झाले ते सर्व टप्प्याटप्प्याने जाहीर करण्यात आले आहेत. उर्वरित प्राप्त निकालांवरही सर्व अनुषंगिक प्रक्रिया सुरू असून, तेही आज सायंकाळपर्यंत प्रकाशित होत आहेत.” – डाॅ. प्रभाकर देसाई, प्रभारी संचालक, परीक्षा व मूल्यमापन मंडळ