येरवडा – मुख्य रस्त्यालगत महापालिकेची शाळा असल्याने विद्यार्थ्यांना जीव मुठीत घेऊन रस्ता ओलांडावा लागतो. विद्यार्थ्यांना रस्ता सुरक्षित ओलांडता यावा, वाहनांचा वेग कमी व्हावा, यासाठी स्पीड ब्रेकर बसविण्याची मागणी अनेक वर्षांपासुन पथविभागाकडे करण्यात येत असताना याकडे दुर्लक्ष आहे.

परंतु, सहा महिन्यांपूर्वी उद्‌घाटन झालेल्या फुलेनगर येथील केंद्रीय तपास यंत्रणेच्या कार्यालय आणि अधिकाऱ्यांच्या निवासस्थांनासमोर स्पीड ब्रेकर बसविण्यात आले आहेत. पथविभागाच्या या “तत्परतेतून’ गरीब विद्यार्थ्यांचा जीव महत्वाचा नसून केंद्रीय तपास यंत्रणेच्या अधिकाऱ्यांची सुरक्षितता महत्त्वाची असल्याचेच दिसून येत असल्याची प्रतिक्रिया पालकांनी व्यक्‍त केली आहे.

पुणे-नगर रस्त्यावरील तारकेश्‍वर टेकडीसमोर पालिकेची कर्नल यंग शाळा तसेच स्व.राजीव गांधी रुग्णालय तसेच गोल्फ रस्त्यावरील औद्योगिक शाळेसमोर स्पीड ब्रेकर बसविण्याची मागणी करण्यात आली होती. यासाठी क्षेत्रीय कार्यालयाच्या मोहल्ला कमिटीच्या बैठकीतही नागरिकांनी वारंवार प्रश्‍न उपस्थित केला, मागणी केली. मात्र, याकडे पथ विभागाच्या अधिकाऱ्यांनी नियमाकडे बोट दाखवित स्पीड ब्रेकर बसविण्यासाठी वाहतूक पोलिसांची परवानगी घ्यावी लागते, त्याशिवाय स्पीड ब्रेकर बसविता येत नाही, असे सांगण्यात आले

मात्र, त्याचवेळी केंद्रीय गुन्हे अन्वेषण विभागाचे नवीन कार्यालय व त्यांच्या अधिकाऱ्यांसाठी निवासस्थान असलेल्या फुलेनगर येथील सर्व्हिस रस्त्यावर मात्र पथविभागाने एकाच महिन्यात परवानगी घेत स्पीड ब्रेकर बसविले, ही “तत्परता’ शाळेसमोर स्पीड ब्रेकरसाठी का नाही दाखवत, असा प्रश्‍न पालकांकडून उपस्थित केला जात आहे.

कर्नल यंग शाळेजवळ स्पीड ब्रेकर बसविण्यासाठी वाहतूक विभागाचा अभिप्राय मागविला असून वाहतूक विभागाकडून पत्र येताच स्पीड ब्रेकर बसविण्यात येतील. – अक्षय मोडवे, कनिष्ठ अभियंता, पथविभाग

गोल्फ कोर्स रस्त्यावरील एक शाळा आणि तारकेश्‍वर टेकडी येथेल कर्नल यंग शाळेसमोर स्पीड ब्रेकर बसवावा, अशी मागणी शाळा सुरू होण्यापूर्वी केली होती. याठिकाणी दररोज छोटे-मोठे अपघात होतात. एखादा मोठा अपघात झाल्यास त्याला पथविभाग आणि वाहतूक विभाग जबाबदार असेल. – रुपेश गायकवाड, सामाजिक कार्यकर्ता