Spain: इराण आणि इस्रायलमधील संघर्ष आता जागतिक राजकारणात तीव्र पडसाद उमटवत आहे. अमेरिकेने इराणवर सुरू केलेल्या लष्करी कारवाईला स्पेनने कडाडून विरोध दर्शवला असून, आपल्या भूमीवरील संयुक्त लष्करी तळांचा वापर करण्यास अमेरिकेला स्पष्ट नकार दिला आहे. स्पेनचे पंतप्रधान पेड्रो सांचेझ यांनी या लष्करी हस्तक्षेपाला “अन्यायकारक आणि धोकादायक” असे संबोधले आहे. तळांच्या वापरावर बंदी: स्पेनची भूमिका स्पष्ट – स्पेनमधील रोता (Rota) आणि मोरोन (Moron) हे दोन महत्त्वाचे लष्करी तळ अमेरिका आणि स्पेन संयुक्तपणे चालवतात. मात्र, इराणवरील हल्ल्यांसाठी या तळांचा वापर करण्यास स्पेन सरकारने परवानगी नाकारली आहे. परराष्ट्र मंत्री जोसे मॅन्युएल अल्बारेस यांनी स्पष्ट केले की, “आम्हाला इराणमध्ये लोकशाही आणि स्वातंत्र्य हवे आहे, परंतु आंतरराष्ट्रीय कायद्यांचे उल्लंघन करून होणाऱ्या कोणत्याही लष्करी कारवाईसाठी आम्ही आमच्या तळांचा वापर करू देणार नाही.” संरक्षण मंत्री मार्गारीटा रोबल्स यांनीही दुजोरा दिला की, अमेरिकेसोबतचा करार हा आंतरराष्ट्रीय कायदेशीर चौकटीत राहूनच राबवला जाईल. SIP: इराण-इस्रायल युद्धामुळे शेअर बाजार कोसळला; तुमची SIP सुरू ठेवावी की बंद करावी? तज्ज्ञांचा मोलाचा सल्ला विमानांचे जर्मनीकडे कूच – ‘फ्लाइट रडार २४’ या वेबसाइटच्या माहितीनुसार, स्पेनने नकार दिल्यानंतर अमेरिकेची किमान १५ विमाने रोता आणि मोरोन तळांवरून बाहेर पडली आहेत. यातील किमान ७ विमानांनी जर्मनीतील रामस्टीन (Ramstein) हवाई तळावर लँडिंग केले आहे. अमेरिकन संरक्षण विभागाने या विमानांच्या हालचालीवर अधिकृत भाष्य करण्यास नकार दिला आहे. युरोपीय देशांमध्ये मतभेद – इराण प्रश्नावरून युरोपीय देशांमध्ये दोन गट पडल्याचे चित्र दिसत आहे. स्पेन: पंतप्रधान पेड्रो सांचेझ यांनी डोनाल्ड ट्रम्प आणि बेंजामिन नेतान्याहू यांच्या धोरणांवर सडकून टीका केली आहे. ही कारवाई जगाला अधिक अस्थिर करत असल्याचे त्यांनी म्हटले आहे. ब्रिटन: सुरुवातीला नकार देणाऱ्या ब्रिटनने आपला पवित्रा बदलला आहे. इराणने सायप्रसमधील ब्रिटीश तळावर केलेल्या प्रतिहल्ल्यानंतर पंतप्रधान कीर स्टार्मर यांनी अमेरिकेला तळांचा वापर करण्याची परवानगी दिली आहे. जर्मनी: जर्मनीचे चॅन्सेलर फ्रेडरिक मर्झ यांनी मध्यममार्ग स्वीकारला असून, ते लवकरच वॉशिंग्टनमध्ये ट्रम्प यांची भेट घेणार आहेत. त्यांनी अमेरिकेच्या कारवाईवर टीका करण्याचे टाळले आहे. ट्रम्प यांची नाराजी – स्पेनच्या या भूमिकेमुळे अमेरिकेचे राष्ट्राध्यक्ष डोनाल्ड ट्रम्प नाराज होण्याची शक्यता आहे. यापूर्वीच स्पेनने नाटो (NATO) देशांच्या संरक्षण खर्चात वाढ करण्यास नकार दिल्याने ट्रम्प यांनी सांचेझ सरकारवर टीका केली होती. आता लष्करी तळांचा वापर रोखल्याने अमेरिका-स्पेन संबंधांमध्ये तणाव निर्माण होऊ शकतो.