Sharad Kapoor : ‘शरद कपूर’च्या मदतीसाठी धावला सोनू सूद; फक्त उपचार नाही तर सिनेमातही देणार काम
शाहरुख खानच्या 'जोश' चित्रपटातील खलनायकाच्या भूमिकेमुळे लोकप्रिय झालेला हा अभिनेता सध्या आयुष्यातील अत्यंत कठीण काळातून जात आहे.

Sharad Kapoor : बॉलिवूडमध्ये काही कलाकार असे असतात, ज्यांनी आपल्या अभिनयाच्या जोरावर एकेकाळी प्रेक्षकांच्या मनावर राज्य केलं; मात्र काळ बदलतो आणि प्रसिद्धीच्या झगमगाटात चमकणारे हेच चेहरे अचानक पडद्यावरून गायब होतात. अभिनेता शरद कपूर यांच्यासोबतही असंच काहीसं घडलं आहे.
शाहरुख खानच्या ‘जोश’ चित्रपटातील खलनायकाच्या भूमिकेमुळे लोकप्रिय झालेला हा अभिनेता सध्या आयुष्यातील अत्यंत कठीण काळातून जात आहे. एकेकाळी मोठ्या पडद्यावर आपल्या अभिनयाची छाप पाडणाऱ्या शरद कपूरची सध्याची अवस्था पाहून चाहत्यांनाही धक्का बसला. प्रकृतीच्या समस्यांमुळे त्याला दैनंदिन कामे करणंही कठीण झालं आहे. अशातच त्याचा एक व्हिडीओ सोशल मीडियावर व्हायरल झाला आणि त्याच्या संघर्षाची कहाणी समोर आली.
मात्र, या कठीण काळात शरद कपूर एकटा नाही. त्याची परिस्थिती समजल्यानंतर बॉलिवूडमधील काही कलाकार त्याच्या मदतीसाठी पुढे आले आहेत. अभिनेता सलमान खान आणि सोनू सूद यांनी त्याला मदतीचा हात दिल्याची माहिती समोर आली आहे. विशेष म्हणजे, सोनू सूदने केवळ उपचारांसाठी मदत करण्याची तयारी दर्शवली नाही, तर शरदला पुन्हा अभिनयाच्या क्षेत्रात संधी मिळवून देण्याबाबतही सकारात्मक भूमिका घेतल्याचे वृत्त आहे.
सोनू सूद मदतीसाठी पुढे; उपचारांची जबाबदारी घेण्याची तयारी
अभिनेता सोनू सूद हा केवळ आपल्या अभिनयासाठीच नव्हे, तर अडचणीत असलेल्या लोकांना मदत करण्यासाठीही ओळखला जातो. कोरोना काळापासून त्याने अनेक गरजू लोकांना मदतीचा हात दिला आहे. आता शरद कपूरच्या प्रकृतीविषयी आणि त्याच्या अडचणींविषयी समजल्यानंतर सोनूने त्याच्या मदतीसाठी पुढाकार घेतल्याचे वृत्त आहे.
सोनू सूद शरद कपूरच्या प्रकृतीची आणि त्याला आवश्यक असलेल्या मदतीची सातत्याने विचारपूस करत आहे. त्याच्या उपचारांसाठी आवश्यक वैद्यकीय साहित्याची व्यवस्था करण्याबाबतही सोनूने पुढाकार घेतल्याचे सांगितले जात आहे. तसेच शरदला पुन्हा चित्रपटांमध्ये काम मिळावे, यासाठीही तो प्रयत्न करण्याच्या तयारीत असल्याची माहिती समोर आली आहे.
दरम्यान, १५ नोव्हेंबर रोजी सोनू सूद आणि शरद कपूर यांची भेट झाल्याची चर्चा आहे. या भेटीत शरदच्या प्रकृतीविषयी, उपचारांविषयी आणि भविष्यातील कामाविषयी चर्चा झाल्याचे सांगितले जात आहे. शरदच्या पायावरील उपचारांसाठी डॉक्टरांची टीम तयार करण्याबाबतही वृत्त प्रसिद्ध झाले आहे. मात्र, या भेटीचा आणि उपचारांच्या व्यवस्थेचा अधिकृत तपशील अद्याप स्पष्ट झालेला नाही.







