Amitabh Bachchan : बुलेटप्रूफ केबिनमध्येही गोळ्या घालू.! अमिताभ बच्चन यांना जीवे मारण्याची धमकी; मुंबईत २०० जण तयार, ‘त्या’पोस्टने खळबळ
अमिताभ बच्चन यांच्याशी संबंधित कथित जुन्या वक्तव्याचा संदर्भ देत हा धमकीचा संदेश प्रसिद्ध करण्यात आल्याचे वृत्त आहे.

Amitabh Bachchan : बॉलिवूडचे महानायक अमिताभ बच्चन आणि त्यांचे पुत्र अभिनेता अभिषेक बच्चन यांच्या सुरक्षेचा प्रश्न पुन्हा एकदा ऐरणीवर आला आहे. दोन्ही अभिनेत्यांना थेट जीवे मारण्याची धमकी देण्यात आल्याने मनोरंजन विश्वासह सुरक्षा यंत्रणांमध्येही खळबळ उडाली आहे. कुख्यात गँगस्टर गोल्डी ढिल्लों याच्या नावाने सोशल मीडियावर एक धमकीची पोस्ट आणि ऑडिओ शेअर करण्यात आला आहे.
यामध्ये अमिताभ आणि अभिषेक बच्चन यांना लक्ष्य करण्याचा इशारा देण्यात आला आहे. विशेष म्हणजे, दोघांनी कितीही बुलेटप्रूफ केबिन तयार केल्या किंवा सुरक्षेची व्यवस्था वाढवली, तरी त्यांना संपवू, अशा स्वरूपाची धमकी या पोस्टमध्ये देण्यात आली आहे. ‘बुलेटप्रूफ केबिनमध्येही गोळ्या घालू’, अशा धमकीच्या भाषेमुळे या प्रकरणाची गंभीरता वाढली आहे.
विशेष म्हणजे, दिल्ली पोलिसांच्या स्पेशल सेलने नुकतेच दोन संशयित शूटर्सना अटक केली होती. त्यांच्याकडून मुंबईतील एका बॉलिवूड अभिनेत्यावर गोळीबार करण्याचा कथित कट उधळल्याची माहिती समोर आली होती. या कारवाईनंतरच गोल्डी ढिल्लोंच्या नावाने धमकीची पोस्ट समोर आली आहे. त्यामुळे बच्चन पिता-पुत्रांना असलेला संभाव्य धोका आणि या संपूर्ण प्रकरणामागील सूत्रधार कोण, याबाबत अनेक प्रश्न उपस्थित होत आहेत.
दिल्ली पोलिसांची मोठी कारवाई; दोन शूटर्सना अटक
मिळालेल्या माहितीनुसार, दिल्ली पोलिसांच्या स्पेशल सेलने विकास ठाकूर उर्फ विक्की आणि दीपक सिंह उर्फ दीप या दोन संशयित शूटर्सना अटक केली आहे. विकास ठाकूर याला दिल्लीतून, तर दीपक सिंह याला मुंबईतून ताब्यात घेण्यात आले. या दोघांचा संबंध परदेशात असलेल्या गुन्हेगारी टोळीच्या सूत्रधारांशी असल्याचा तपास यंत्रणांचा आरोप आहे.
पोलिसांच्या तपासानुसार, या दोघांना दोन वेगवेगळ्या लक्ष्यांवर हल्ला करण्याची जबाबदारी देण्यात आली होती. यातील एका प्रकरणात दिल्लीतील व्यावसायिकावर खंडणीसाठी गोळीबार करण्याचा कट होता, तर दुसऱ्या प्रकरणात १९८४ मधील शीखविरोधी दंगलींसंदर्भातील कथित वक्तव्यावरून मुंबईतील एका बॉलिवूड अभिनेत्याला लक्ष्य करण्याची योजना होती. पोलिसांनी कारवाई करत हा कथित कट उधळून लावला. मात्र, पोलिसांनी सुरुवातीला संबंधित अभिनेत्याचे नाव अधिकृतपणे जाहीर केले नव्हते.
‘मुंबईत आमचे आणखी २०० साथीदार तयार’; गोल्डी ढिल्लोंचा दावा
या दोघांच्या अटकेनंतर गोल्डी ढिल्लोंच्या नावाने सोशल मीडियावर पोस्ट आणि ऑडिओ संदेश प्रसिद्ध करण्यात आला. या संदेशात विकास ठाकूर आणि दीपक सिंह हे आपल्याच गटातील सदस्य असल्याचा दावा करण्यात आला आहे. तसेच त्यांना इतर कोणत्याही गुन्हेगारी टोळीशी जोडू नये, असेही म्हटले आहे.
विशेष म्हणजे, या दोघांना अटक झाल्याने कोणताही हल्ल्याचा कट उधळला गेलेला नाही किंवा टोळीच्या कारवाया थांबलेल्या नाहीत, असा दावा या संदेशातून करण्यात आला आहे. मुंबईत आपले आणखी २०० साथीदार तयार असल्याचा उल्लेखही करण्यात आला आहे. त्यामुळे या टोळीचे मुंबईतील कथित नेटवर्क किती मोठे आहे आणि त्यामागे आणखी कोणाचा सहभाग आहे, याचा तपास महत्त्वाचा ठरणार आहे.
अमिताभ आणि अभिषेक बच्चन यांना थेट लक्ष्य
या संपूर्ण प्रकरणातील सर्वाधिक धक्कादायक बाब म्हणजे अमिताभ बच्चन आणि अभिषेक बच्चन यांना देण्यात आलेली थेट धमकी. गोल्डी ढिल्लोंच्या नावाने प्रसिद्ध झालेल्या संदेशात दोन्ही अभिनेत्यांचा स्पष्ट उल्लेख करण्यात आला आहे. त्यांनी कितीही बुलेटप्रूफ केबिन तयार केल्या किंवा सुरक्षेचे कितीही उपाय केले, तरी त्यांच्यावर हल्ला केला जाईल, अशी धमकी देण्यात आली आहे.
१९८४ च्या शीखविरोधी दंगलींचा संदर्भ; धमकीमागचं कारण काय?
गोल्डी ढिल्लोंच्या नावाने करण्यात आलेल्या या पोस्टमध्ये १९८४ मधील शीखविरोधी दंगलींचा संदर्भ देण्यात आला आहे. या दंगलींमध्ये सहभागी असल्याचा आरोप असलेल्या व्यक्तींना कधीही माफ केले जाणार नाही, असा इशारा देण्यात आला आहे. तसेच शीख समाजाविरोधात बोलणाऱ्या व्यक्तींना आपला शत्रू मानले जाईल, असेही या संदेशात म्हटले आहे.
या पोस्टमध्ये #JusticeOf1984 आणि #GoldyDhillonGroup यांसारख्या हॅशटॅगचा वापर करण्यात आला आहे. अमिताभ बच्चन यांच्याशी संबंधित कथित जुन्या वक्तव्याचा संदर्भ देत हा धमकीचा संदेश प्रसिद्ध करण्यात आल्याचे वृत्त आहे. मात्र, या आरोपांची स्वतंत्रपणे पुष्टी झालेली नाही. अमिताभ बच्चन यांच्यावर यापूर्वीही १९८४ च्या दंगलींसंदर्भात आरोप करण्यात आले होते. त्यांनी हे आरोप फेटाळले आहेत.







