Accident News : वाढदिवस साजरा करून घरी परतणाऱ्या पाच मित्रांच्या कारला भीषण अपघात झाल्याने तिघांचा दुर्दैवी मृत्यू झाला. सोलापूर-हैदराबाद महामार्गावरील पर्ल गार्डन परिसरात गुरुवारी पहाटे ही दुर्घटना घडली. या घटनेमुळे सोलापूर शहरात हळहळ व्यक्त होत आहे. (Accident News) मृतांमध्ये अमोल श्रीशैल येरटे (४०), शेखर सुरेकर (३३) आणि वाढदिवस असलेले कादर सैदु हंडे (३४) यांचा समावेश आहे. हे सर्व मित्र सोलापुरातील एका सुझुकी शोरूममध्ये एकत्र काम करत होते. कादर हंडे यांच्या वाढदिवसानिमित्त देगाव रोडवरील हॉटेलमध्ये पार्टीचे आयोजन करण्यात आले होते. (Accident News) रात्री उशिरा पार्टी संपल्यानंतर सर्व मित्र कारने घरी निघाले. पहाटे दीडच्या सुमारास पर्ल गार्डनजवळ महामार्गावर एका टेम्पोचा गिअर बॉक्स बिघडल्याने तो रस्त्यावर उभा होता. अचानक समोर टेम्पो दिसल्याने चालक अमोल येरटे यांनी कार वाचवण्याचा प्रयत्न केला. मात्र, नियंत्रण सुटल्याने कार टेम्पोवर आदळली आणि सुमारे १५० फूट फरफटत जाऊन दुभाजकावर धडकली. (Accident News) अपघात इतका भीषण होता की कारचा पुढील भाग पूर्णपणे चक्काचूर झाला. अमोल येरटे आणि शेखर सुरेकर यांचा जागीच मृत्यू झाला, तर गंभीर जखमी कादर हंडे यांचा उपचारादरम्यान मृत्यू झाला. (Accident News) घटनेची माहिती मिळताच जोडभावी पेठ पोलीस घटनास्थळी दाखल झाले आणि मदतकार्य सुरू केले. या घटनेमुळे तिन्ही कुटुंबांवर दुःखाचा डोंगर कोसळला असून पुढील तपास सुरू आहे. (Accident News)