Shafali Smriti Record : स्मृती-शफालीचा वर्ल्ड रेकॉर्ड! एकाच वर्षात तब्बल ‘इतक्या’ धावांची भागीदारी करणारी ठरली जगातील पहिलीच जोडी
Shafali Smriti Record : रायपूर येथे भारत आणि झिम्बाब्वे महिला संघांमध्ये झालेल्या दुसऱ्या टी-२० सामन्यात भारतीय संघाने नऊ गडी राखून दणदणीत विजय नोंदवला. शफाली वर्माने अवघ्या २५ चेंडूंमध्ये ५५ धावांची धडाकेबाज खेळी केली.
Smriti Mandhana and Shafali Verma Create World Record With 1000 Partnership Runs in 2026 : छत्तीसगडमधील रायपूर येथील शहीद वीर नारायण सिंह आंतरराष्ट्रीय स्टेडियमवर खेळल्या गेलेल्या दुसऱ्या टी-२० सामन्यात भारतीय महिला संघाने झिम्बाब्वेचा ९ गडी राखून धुव्वा उडवला. भारताच्या या विजयात युवा सलामीवीर शफाली वर्मा हिने अवघ्या २५ चेंडूंत ५५ धावांची वादळी खेळी साकारली. तिला कर्णधार स्मृती मानधनाने अप्रतिम साथ दिली. या सामन्यात विजय मिळवण्यासोबतच स्मृती आणि शफालीच्या या स्फोटक जोडीने आंतरराष्ट्रीय महिला टी-२० क्रिकेटमधील अनेक मोठे जागतिक विक्रम मोडले.
एकाच कॅलेंडर वर्षात १००० धावांची अभेद्य भागीदारीसह रचला इतिहास –
महिला आंतरराष्ट्रीय टी-२० क्रिकेटच्या इतिहासात एकाच कॅलेंडर वर्षात १००० हून अधिक धावांची भागीदारी रचणारी स्मृती मानधना आणि शफाली वर्मा ही जगातील पहिलीच जोडी ठरली आहे. आजवर पुरुष किंवा महिला क्रिकेटमध्ये असा पराक्रम कोणालाही करता आलेला नाही. २०२६ या वर्षात मैदानावर उतरून सातत्याने धावांचा पाऊस पाडणाऱ्या या जोडीने सध्याच्या घडीला आपणच जगातील सर्वोत्तम सलामी जोडी असल्याचे आपल्या बॅटने सिद्ध करून दाखवले आहे.
५० हून अधिक धावांच्या भागीदारीचा नवा विश्वविक्रम –
🚨HISTORY FOR SMRITI MANDHANA & SHAFALI VERMA🇮🇳🔥
The first pair in Women’s T20I history to aggregate 1,000+ runs together in a calendar year for any wicket.
A record-breaking partnership from Team India’s dynamic duo.
#SmritiMandhana #ShafaliVerma https://t.co/1aMo4PcPZf
— Sports Nexus (@SportsNexusNews) October 18, 2026
या सामन्यादरम्यान स्मृती आणि शफालीने आणखी एका विक्रमाला गवसणी घातली. २०२६ या वर्षात आतापर्यंत तब्बल ९ वेळा ५० किंवा त्याहून अधिक धावांची भागीदारी करून या दोघींनी हॉन्ग कॉन्गच्या यास्मिन दसवानी आणि नताशा माइल्स यांच्या ८ वेळा ५० किंवा त्यापेक्षा जास्त धावांच्या भागीदारीच्या विक्रमाला मागे टाकले. विशेष म्हणजे या यादीत तिसऱ्या क्रमांकावरही स्मृती आणि शफालीचीच जोडी असून त्यांनी २०२४ मध्ये ७ वेळा अशी कामगिरी केली होती.
६७ चेंडू राखून ऐतिहासिक विजय; भारताचा मोठा पराक्रम –
झिम्बाब्वेने दिलेले १०३ धावांचे आव्हान भारतीय संघाने अवघ्या काही षटकांत पार केले. आंतरराष्ट्रीय टी-२० क्रिकेटच्या इतिहासात १०० हून अधिक धावांच्या लक्ष्याचा पाठलाग करताना तब्बल ६७ चेंडू शिल्लक ठेवून सामना जिंकण्याचा विश्वविक्रम भारतीय संघाने आपल्या नावावर केला. इतक्या मोठ्या फरकाने आणि एवढे चेंडू बाकी ठेवून १०० हून अधिक धावांचे लक्ष्य गाठणारा भारत हा जगातील पहिलाच संघ ठरला आहे.
