Sinhagad Road Murder : अण्णाभाऊ साठे जयंतीच्या मिरवणुकीचा उत्साह काही क्षणांतच रक्तरंजित झाला. सिंहगड रस्ता परिसरातील पानमळा येथे प्रतिस्पर्धी टोळीचा सदस्य असल्याचा गैरसमज झाल्याने १४ जणांच्या टोळक्याने एका २२ वर्षीय तरुणाला भररस्त्यात बेदम मारहाण केली. या अमानुष हल्ल्यात गंभीर जखमी झालेल्या शुभम राजू घोडके (रा. चरवड वस्ती, वडगाव बुद्रुक) याचा मृत्यू झाला.

या प्रकरणी पर्वती पोलिसांनी तत्काळ कारवाई करत अर्जुन कांबळे, अनिकेत कांबळे, गणेश कदम, मुंकुद राजगुरू आणि अंकुश काळे या पाच जणांना अटक केली असून, पाच अल्पवयीन मुलांना ताब्यात घेतले आहे. उर्वरित आरोपींचा शोध सुरू आहे. पोलिसांनी दिलेल्या माहितीनुसार, शुभम एका कार कंपनीच्या सर्व्हिस सेंटरमध्ये काम करत होता.

१ ऑगस्ट रोजी रात्री तो आपल्या मेहुण्यासोबत अण्णाभाऊ साठे जयंतीची मिरवणूक पाहण्यासाठी गेला होता. त्याचवेळी समोरून येणाऱ्या टोळक्याने शुभमकडे पाहत “हा पठारावरचा आहे… मारा याला!” अशी आरोळी दिली आणि क्षणार्धात त्याच्यावर तुटून पडले.लाथाबुक्क्यांसह हातातील वस्तूंनी शुभमला बेदम मारहाण करण्यात आली.

तो रक्ताच्या थारोळ्यात पडला असतानाही मारहाण सुरूच होती. स्थानिकांनी धाव घेईपर्यंत आरोपी पसार झाले. गंभीर जखमी अवस्थेत शुभमला रुग्णालयात नेण्यात आले; मात्र उपचारापूर्वीच त्याचा मृत्यू झाला.घटनेनंतर पर्वती पोलिसांनी सीसीटीव्ही फुटेज, तांत्रिक तपास आणि गुप्त माहितीच्या आधारे काही तासांत पाच आरोपींना अटक केली.

या गुन्ह्यात सहभागी असलेल्या पाच अल्पवयीन मुलांनाही ताब्यात घेण्यात आले असून, टोळीतील इतर सदस्यांचा शोध सुरू आहे. वरिष्ठ पोलीस निरीक्षक राजेंद्र सहाणे यांनी सांगितले की, अटक केलेले आणि ताब्यात घेतलेले आरोपी सराईत गुन्हेगार आहेत. त्यांच्यावर विविध गुन्हे दाखल आहेत. मृत शुभमचा त्यांच्याशी कोणताही संबंध नव्हता. तो केवळ मिरवणूक पाहण्यासाठी आला होता; मात्र गैरसमजातून त्याचा जीव गेला.