Siddharth Jadhav on Gautami Patil: सध्या अनेक मराठी चित्रपट प्रेक्षकांचे मनोरंजन करत आहेत. ‘दशावतार’, ‘बिन लग्नाची गोष्ट’, ‘आरपार’ या सिनेमांनी बॉक्स ऑफिसवर धमाल केली आहे. या चित्रपटांसोबतच लवकरच आणखी काही चित्रपट प्रेक्षकांच्या भेटीला येणार आहेत. त्यात ‘आतली बातमी फुटली’ आणि ‘साबर बोंडं’ या चित्रपटांचा समावेश आहे. ‘आतली बातमी फुटली’ या चित्रपटात सिद्धार्थ जाधव प्रमुख भूमिकेत आहे. या सिनेमातील ‘सखुबाई’ या गाण्यात गौतमी पाटीलसह डान्सिंग सीन्स आहेत. या गाण्यावर सिद्धार्थ जाधवने मराठी टीव्ही मीडियाला दिलेल्या मुलाखतीत आपला अनुभव शेअर केला. सिद्धार्थ म्हणाला, “डान्सची कोरिओग्राफी राहुल ठोंबरे यांनी केली आहे. तो कमालीचा मुलगा आहे. आमची टेक्निकल टीम कमाल आहे. त्यांनी सेटअप एका दिवसात केला. आम्ही ते गाणं एका रात्रीत शूट केलं, पण तुम्ही सेटअप पाहिला तर तो चार-पाच दिवसात केल्यासारखा वाटेल.” गौतमी पाटीलबद्दल तो म्हणाला, “गौतमीचा एक ऑरा आहे आणि तो खूप छान आहे. तिने आपले काम अगदी नम्रतेने केले, आणि ती शूट झाल्यानंतर विचारायची, ‘दादा, शूटिंग कसं झालं? आपण मॉनिटर बघूयात का?’ मी तिला म्हणायचो, ‘तू छान कर, मस्त कर.’ हे गाणं चांगलं झालं, पण ते फक्त माझ्या किंवा गौतमीमुळे नाही; ती संपूर्ण टीमची मेहनत आहे.” काही दिवसांपूर्वीच ‘सखुबाई’ हे गाणे प्रेक्षकांच्या भेटीला आले आणि ते ट्रेंड झाले. प्रेक्षकांनी गौतमी व सिद्धार्थच्या परफॉर्मन्सचे कौतुक केले.
