Shubman Gill Record : तिसऱ्या सामन्यात १ धावेवर बाद होऊनही शुबमन गिलचा वर्ल्ड रेकॉर्ड! ब्रेंडन टेलरचा मोडला १५ वर्षे जुना विक्रम
Shubman Gill Record : तीन सामन्यांच्या एकदिवसीय मालिकेत कर्णधार म्हणून सर्वाधिक धावा करण्याचा ब्रेंडन टेलरचा १५ वर्षे जुना विश्वविक्रम गिलने मोडीत काढला आहे.
Shubman Gill Breaks Brendan Taylor 15 Year Old Record 334 Runs in IND vs WI ODI Series : भारत आणि वेस्ट इंडिज दरम्यानची तीन सामन्यांची एकदिवसीय मालिका भारतीय संघाने २-१ अशा फरकाने खिशात घातली. या मालिकेत भारतीय कर्णधार शुबमन गिलचे (Shubman Gill) तुफानी रूप पाहायला मिळाले. पहिल्या सामन्यात शतक आणि दुसऱ्या सामन्यात विक्रमी द्विशतक ठोकल्यानंतर, तिसऱ्या सामन्यात तो अवघ्या एका धावेवर बाद झाला. मात्र, तरीही गिलने एकदिवसीय क्रिकेटच्या इतिहासात असा पराक्रम केला जो आजवर जगातील कोणत्याही कर्णधाराला जमला नव्हता. त्याने १५ वर्षांचा विश्वविक्रम मोडला.
१६७ च्या सरासरीने ३३४ धावा; १५ वर्षे जुना रेकॉर्ड इतिहासजमा!
वेस्ट इंडिजविरुद्धच्या या मालिकेत शुबमन गिलने तीन डावांमध्ये १६७ च्या अविश्वसनीय सरासरीने तब्बल ३३४ धावा कुटल्या. यासह त्याने २०११ मध्ये न्यूझीलंडविरुद्ध ३१० धावा करणाऱ्या झिम्बाब्वेच्या ब्रेंडन टेलरला मागे टाकले. तीन सामन्यांच्या वनडे मालिकेत ३०० हून अधिक धावा करणारा गिल हा जगातील केवळ दुसराच कर्णधार ठरला आहे. या यादीत तिसऱ्या स्थानावर विंडीजचा शाई होप (२७८ धावा), चौथ्या स्थानावर पाकिस्तानचा बाबर आझम (२७६ धावा) आहे. यापूर्वी भारतासाठी हा विक्रम विराट कोहलीच्या (२६३ धावा) नावावर होता, ज्याला गिलने सहज मागे टाकले.
३ सामन्यांच्या वनडे मालिकेत सर्वाधिक धावा करणारे कर्णधार:
A monumental double hundred ✅
A classy century ✅
A massive 3️⃣3️⃣4️⃣ runs across the series ✅Skipper @ShubmanGill dominates the run charts to bag the Player of the Series award 🔥#TeamIndia | #INDvWI | @mflone_ pic.twitter.com/88FrvwpQXu
— BCCI (@BCCI) October 3, 2026
- शुबमन गिल (भारत): ३३४ धावा (विरुद्ध वेस्ट इंडिज, २०२६)
- ब्रेंडन टेलर (झिम्बाब्वे): ३१० धावा (विरुद्ध न्यूझीलंड, २०११)
- शाई होप (वेस्ट इंडिज): २७८ धावा (विरुद्ध भारत, २०२६)
- बाबर आझम (पाकिस्तान): २७६ धावा (विरुद्ध ऑस्ट्रेलिया, २०२१)
- खुर्रम खान (यूएई): २७० धावा (विरुद्ध अफगाणिस्तान, २०१४)
धोनी, गांगुली अन् युवराजची बरोबरी; ७ वा ‘प्लेअर ऑफ द सिरीज’ पुरस्कार!
A series victory to cherish! 🏆
🎥 Captain Shubman Gill receives the Muthoot Fincorp India v West Indies ODI Series trophy as #TeamIndia celebrate the feat 🙌#INDvWI | @ShubmanGill | @mflone_ pic.twitter.com/5VzRPAEE43
— BCCI (@BCCI) October 3, 2026
या ऐतिहासिक कामगिरीसाठी शुबमन गिलला ‘प्लेअर ऑफ द सिरीज’ पुरस्काराने गौरवण्यात आले. गिलच्या एकदिवसीय कारकिर्दीतील हा सातवा मालिकावीर पुरस्कार ठरला. या पुरस्कारासह त्याने भारताचे माजी दिग्गज खेळाडू सौरव गांगुली, युवराज सिंग आणि महेंद्रसिंह धोनी यांच्या ७ पुरस्कारांच्या विक्रमाशी बरोबरी साधली. आता भारतीय खेळाडूंमध्ये गिलच्या पुढे केवळ सचिन तेंडुलकर आणि विराट कोहली हे दोनच दिग्गज आहेत.
