Shrirang Barne – पिंपरी-चिंचवड महापालिका हद्दीतून जाणाऱ्या मुंबई-बंगळुरू महामार्गावरील मामुर्डी ते वाकडदरम्यानच्या सेवा रस्त्याचे काम निकृष्ट दर्जाचे झाल्याच्या तक्रारी प्राप्त होत आहेत. या कामाची उच्चस्तरीय तांत्रिक तपासणी करून आवश्यक सुधारणा करण्याची मागणी खासदार श्रीरंग बारणे यांनी केंद्रीय रस्ते वाहतूक व महामार्ग मंत्री नितीन गडकरी यांच्याकडे केली.

देहूरोड बायपास, किवळे, रावेत मार्गे वाकडपर्यंत राष्ट्रीय महामार्गाचे काम डीएमआर इन्फ्रा या ठेकेदारामार्फत सुरू आहे. किवळे जंक्शन परिसरातील अंडरपास तसेच सेवा रस्त्याचे काम गुणवत्तापूर्ण झाले नसल्याच्या तक्रारी स्थानिक नागरिकांकडून करण्यात आल्या आहेत. अनेक ठिकाणी मोठे खड्डे पडले असून स्टॉर्म वॉटर ड्रेनेजची व्यवस्था योग्य नसल्याने पावसाचे पाणी रस्त्यावर साचत आहे.

त्यामुळे वाहतुकीला अडथळा निर्माण होऊन अपघातांचा धोका वाढला आहे. अशा तक्रारी नागरिकांकडून करण्यात येत आहे. या मार्गावर सुमारे ८.२५ किलोमीटर लांबीचा एलिव्हेटेड रोड प्रस्तावित आहे. त्यामुळे सध्या सुरू असलेल्या कामाची निष्पक्ष व तांत्रिक तपासणी करून बांधकाम निर्धारित मानकांनुसार करण्यात यावे, अशी मागणी बारणे यांनी केली. त्याचबरोबर रस्ता, अंडरपास, ड्रेनेज आणि सेवा रस्त्याची आवश्यक दुरुस्ती करून घेण्याचीही त्यांनी मागणी केली.

दरम्यान, नितीन गडकरी यांनी संबंधित ठेकेदार कंपनीच्या अधिकाऱ्यांशी दूरध्वनीवरून संपर्क साधून कामाचा दर्जा सुधारण्याचे निर्देश दिले. निकृष्ट दर्जाचे काम खपवून घेतले जाणार नाही. कामात सुधारणा न झाल्यास ठेकेदाराचे काम काढून घेण्यासह त्याला टर्मिनेट करण्याचा इशाराही यावेळी गडकरी यांनी दिला.