प्रभात वृत्तसेवा
पिंपरी – मावळ लोकसभा मतदारसंघातील वडेश्वर आणि माऊ ग्रामपंचायत हद्दीतील अंदर मावळ भागातील नागरिकांसाठी मोठी विकासाच्या दृष्टीने मोठी संधी उपलब्ध झाली आहे. जिल्हा परिषद पुणे आणि मावळ पंचायत समिती मार्फत आरोग्य उपकेंद्र, उपरुग्णालय, पशुवैद्यकीय दवाखाना आणि तलाठी कार्यालय उभारण्यासाठी टाटा पॉवर कंपनीकडून २० गुंठे जागा मोफत देण्यात आली आहे.या निर्णयामुळे अंदर मावळ भागात मूलभूत आरोग्य आणि प्रशासनिक सुविधा उभारण्याचा मार्ग अखेर मोकळा झाला आहे.

शिवसेना जिल्हाप्रमुख राजेश खांडभोर आणि गटविकास अधिकारी कुलदीप प्रधान यांच्या सततच्या पाठपुराव्यामुळे ही जागा वडेश्वर ग्रामपंचायतीस हस्तांतरित करण्यात आली. कागदपत्र हस्तांतरणाचा कार्यक्रम लोणावळा येथील टाटा पॉवर कार्यालयात खासदार श्रीरंग बारणे यांच्या हस्ते संपन्न झाला.यावेळी टाटा पॉवर कंपनीचे अधिकारी मनोहर म्हात्रे, राजेंद्र गावडे, शिवसेना जिल्हाप्रमुख राजेश खांडभोर, मावळ गट विकास अधिकारी कुलदीप प्रधान, सरपंच छाया हेमाडे, ग्रामसेवक सचिन कासार, उपसरपंच वासुदेव लष्करी, ग्रामपंचायत सदस्या मनीषा दरेकर, वासुदेव तनपुरे आदी उपस्थित होते.

“टाटा पॉवर कंपनीने दिलेल्या २० गुंठे जागेमुळे आता सुसज्ज उपआरोग्यकेंद्र, पशुवैद्यकीय दवाखाना आणि तलाठी कार्यालय उभारले जाईल. ही फक्त जमीन नाही, तर नागरिकांच्या आरोग्य, प्रशासन आणि प्राणिप्रेमाशी निगडित सुविधांना जवळ आणणारे एक मोठे पाऊल आहे.”
– श्रीरंग बारणे, खासदार