इंदापूर : दिवंगत उपमुख्यमंत्री अजित पवार यांच्या जयंतीनिमित्त बोरी पंचायत समिती गणातील जिल्हा परिषद शाळांमधील तब्बल १ हजार २२२ विद्यार्थ्यांना स्कूल बॅगचे वाटप करण्यात येणार असून, पंचायत समिती सदस्य श्रीराज भरणे यांच्या पुढाकारातून हा स्तुत्य उपक्रम राबविण्यात येणार असल्याची माहिती त्यांनी दिली.

श्रीराज भरणे म्हणाले की, दिवंगत अजित पवार यांनी राबविलेल्या ‘मॉडर्न स्कूल’ संकल्पनेमुळे राज्यातील प्राथमिक शिक्षणाचा चेहरामोहरा बदलला. इंदापूर तालुक्यातही कृषिमंत्री दत्तात्रय भरणे यांच्या प्रयत्नांतून अनेक जिल्हा परिषद शाळांचे मॉडर्न स्कूलमध्ये रूपांतर झाल्याने विद्यार्थ्यांचा शासकीय शाळांकडे ओढा वाढत आहे. याच पार्श्वभूमीवर विद्यार्थ्यांच्या शैक्षणिक गरजा लक्षात घेऊन बोरी पंचायत समिती गणातील सर्व जिल्हा परिषद शाळांतील विद्यार्थ्यांना स्कूल बॅगचे वितरण करण्यात येणार आहे.

हा उपक्रम श्रीराज भरणे यांच्या संकल्पनेतून साकार होत असून, विशेषतः आर्थिकदृष्ट्या दुर्बल कुटुंबांतील विद्यार्थ्यांना त्याचा मोठा लाभ होणार आहे. शालेय साहित्याची चिंता कमी होऊन विद्यार्थ्यांची शाळेतील नियमित उपस्थिती वाढण्यासही या उपक्रमाची मदत होईल, असा विश्वास त्यांनी व्यक्त केला.

प्रत्येक विद्यार्थ्याला गुणवत्तापूर्ण शिक्षणासाठी आवश्यक सुविधा मिळणे ही समाजाची सामूहिक जबाबदारी आहे. शिक्षणाच्या प्रवासात कोणताही विद्यार्थी मागे राहू नये, या भावनेतून हा छोटासा प्रयत्न आहे,” असे सांगत श्रीराज भरणे म्हणाले की, “समाजसेवा हीच खरी ईश्वरसेवा” या विचारातून उपमुख्यमंत्री सुनेत्रा पवार आणि कृषिमंत्री दत्तात्रय भरणे यांच्या मार्गदर्शनाखाली तालुक्यात विविध सामाजिक उपक्रम सातत्याने राबविले जात आहेत.

 

जिल्हा परिषद शाळांमध्ये पुन्हा एकदा चिमुकल्यांचा किलबिलाट वाढावा, विद्यार्थ्यांना दर्जेदार शिक्षणासोबत आवश्यक शैक्षणिक सुविधा मिळाव्यात आणि पालकांचा जिल्हा परिषद शाळांकडे पाहण्याचा सकारात्मक दृष्टिकोन निर्माण व्हावा, हा या उपक्रमामागील प्रमुख उद्देश आहे.
– श्रीराज भरणे, सदस्य, पंचायत समिती, इंदापूर.