Pune : भारताला विकसित राष्ट्र बनविण्याच्या दिशेने विज्ञान क्षेत्रात महत्त्वाचे योगदान देणाऱ्या महिला शास्त्रज्ञांचा सारसबाग येथील श्री महालक्ष्मी मंदिरातर्फे सन्मान करण्यात आला. भारतीय विज्ञान शिक्षण आणि संशोधन संस्थेचे (आयसर) संचालक डॉ. सुनील भागवत यांच्या हस्ते हा सन्मान सोहळा झाला.

यावेळी विश्वकर्मा विद्यापीठ, पुणेचे उपाध्यक्ष प्रा. डॉ. वासुदेव गाडे प्रमुख पाहुणे म्हणून उपस्थित होते. मंदिर ट्रस्टच्या प्रमुख विश्वस्त अमिता अग्रवाल, विश्वस्त व उत्सव प्रमुख डॉ. तृप्ती अग्रवाल, विश्वस्त भरत अग्रवाल, अ‍ॅड. प्रताप परदेशी, प्रवीण चोरबेले आदी उपस्थित होते.

कार्यक्रमात प्रा. डॉ. सुवर्णा दातार, डॉ. तेजश्री भावे, डॉ. पुराबी गाराई, डॉ. शिल्पा जैन आणि डॉ. मंजु मदान या महिला शास्त्रज्ञांचा गौरव करण्यात आला.

डॉ. सुनील भागवत म्हणाले, विज्ञान आणि शिक्षण क्षेत्रात जबाबदारीने काम करणे महत्त्वाचे आहे. विज्ञानाचा उपयोग समाजाच्या हितासाठी झाला पाहिजे. ज्येष्ठ शास्त्रज्ञ सी. व्ही. रमण यांनीही विज्ञान समाजाप्रती उत्तरदायी असावे, असे सांगितले होते. पुढील पिढी ही अंतराळ तंत्रज्ञानाची आहे. त्यामुळे या क्षेत्रातील आव्हाने आणि प्रश्न सोडविण्यासाठी काम करण्याची गरज आहे. संरक्षण आणि शिक्षण क्षेत्रात महिलांनी आजवर उल्लेखनीय कामगिरी केली आहे. ही परंपरा पुढे सुरू असल्याचा आनंद आहे, असे त्यांनी सांगितले.

भरत अग्रवाल म्हणाले, नवरात्रोत्सवात मंदिरातर्फे दरवर्षी नारी शक्तीचा सन्मान केला जातो. संशोधक महिलांनी आपल्या कार्यातून मानवी जीवन अधिक चांगले आणि समृद्ध करण्यासाठी योगदान दिले आहे. त्यांच्या कार्याचा सन्मान करण्याची संधी मिळणे ही आनंदाची बाब आहे.

युवराज लाहोटी यांनी प्रास्ताविक केले. विशाल सोनी यांनी सन्मानित महिला शास्त्रज्ञांचा परिचय करून दिला. महाआरतीने कार्यक्रमाची सांगता झाली.