पिंपरी – आषाढी एकादशीच्या पार्श्वभूमीवर पिंपरी-चिंचवड शहरातील प्रमुख बाजारपेठांमध्ये उपवासाच्या खाद्यपदार्थांच्या खरेदीसाठी भाविकांची मोठी गर्दी होत आहे. धान्यवर्ज्य करून फळाहार आणि उपवासाचे पदार्थ ग्रहण करण्याच्या परंपरेमुळे साबुदाणा, शेंगदाणे, भगर, रताळी, राजगिरा, सुकामेवा तसेच फळांच्या मागणीत मोठी वाढ झाली आहे.

पिंपरी, चिंचवड, आकुर्डी आणि भोसरी येथील भाजी मंडई, फळबाजार आणि किराणा दुकानांमध्ये सकाळपासूनच ग्राहकांची लगबग पाहायला मिळाली. वाढती मागणी लक्षात घेऊन व्यापाऱ्यांनी उपवासाच्या साहित्याचा अतिरिक्त साठा उपलब्ध करून ठेवला आहे. साबुदाणा, शेंगदाणा कूट, राजगिरा लाडू, उपवासाचे पीठ, चिवडा, चिप्स तसेच फराळासाठी लागणाऱ्या विविध वस्तूंची विक्री मोठ्या प्रमाणावर होत आहे.

व्यापाऱ्यांच्या माहितीनुसार, एकादशीच्या आदल्या दिवशी आणि एकादशीच्या दिवशी विक्रीचा आलेख लक्षणीयरीत्या वाढतो. सफरचंद, केळी, डाळिंब, खजूर यांसह दूध, दही, ताक आणि तुपाच्या मागणीतही दुपटीने वाढ झाली आहे.

आषाढी एकादशीच्या फराळात चव आणि पौष्टिकतेचा उत्तम समतोल पाहायला मिळतो. साबुदाणा आणि शेंगदाणे शरीराला ऊर्जा देतात, तर भगर पचनास हलकी असल्याने उपवासासाठी उत्तम मानली जाते. रताळे आणि राजगिरा शरीराला आवश्यक पोषक घटक पुरवतात. मखाने, सुकामेवा, ताजी फळे, नारळपाणी आणि ताक यांचाही फराळात मोठ्या प्रमाणावर समावेश केला जात आहे.

बदलत्या जीवनशैलीनुसार हॉटेल्स, मिठाई दुकाने आणि गृहउद्योगांकडून विशेष उपवास थाळी आणि फराळाचे पदार्थ उपलब्ध करून दिले जात असले, तरी घरगुती पारंपरिक फराळालाच भाविकांची सर्वाधिक पसंती असल्याचे दिसून येत आहे. आषाढी एकादशीच्या निमित्ताने पिंपरी-चिंचवड शहरातील बाजारपेठा सध्या भक्ती, उत्साह आणि खरेदीच्या गजबजाटाने फुलून गेल्या आहेत.

Devendra Fadnavis: जय हरी विठ्ठल! मुख्यमंत्री देवेंद्र फडणविसांच्या हस्ते विठुरायाची महापूजा संपन्न; धाराशिवचे ‘माने दाम्पत्य’ ठरले मानाचे वारकरी