नवी दिल्ली : राजधानी दिल्लीत जिममध्ये ट्रेमिलवर वर्क आऊट करत असताना ट्रेडमिलमध्ये अचानक करंट आला, त्यामुळे तरुणाचा या विजेच्या धक्क्याने मृत्यू झाल्याची खळबळजनक घटना समोर आली आहे. या प्रकरणाची माहिती मिळताच पोलीस पथक घटनास्थळी पोहोचले आणि त्यांनी पाहणी केली. याप्रकरणी जिम चालकावर गुन्हा दाखल करण्यात आला आहे.

समोर आलेल्या माहितीनुसार, ही घटना दिल्लीच्या रोहिणी येथील आहे. रोहिणी सेक्टर १९ मध्ये राहणारा सक्षम प्रुथी हा याच  परिसरातील सिम्प्लेक्स फिटनेस झोनमध्ये व्यायामासाठी जात होता. सक्षमने बी.टेक केले होते. तो गुरुग्राममधील एका कंपनीत कामाला होता. मंगळवारी सकाळी साडेसातच्या सुमारास सक्षम हा व्यायाम करत असताना ट्रेडमिलमध्ये अचानक करंट लागला.   त्यानंतर तो मागे पडला. यानंतर त्यांची प्रकृती बिघडली.

जिममध्ये वर्कआऊट करणाऱ्या इतर लोकांनी लगेच ट्रेडमिल बंद केली आणि लोकांच्या मदतीने सक्षमला सीआर दिला. दरम्यान, शरीरात कोणतीही हालचाल न झाल्याने त्यांना तातडीने रुग्णालयात नेण्यात आले, तेथे डॉक्टरांनी सक्षमला मृत घोषित केले. या प्रकरणाची माहिती मिळताच पोलीस पथक घटनास्थळी पोहोचले आणि तपास केला.

पोलिसांनी मृतदेह ताब्यात घेऊन पोस्टमॉर्टमसाठी पाठवला. शवविच्छेदन अहवाल आल्यानंतर मृत्यूचे कारण समजू शकेल. तो एक सक्षम अभियंता होता. तो त्याच्या वडिलांचा एकुलता एक मुलगा होता. पोलिसांनी शवविच्छेदनानंतर मृतदेह नातेवाईकांच्या ताब्यात दिला आहे.  ट्रेडमिलमध्ये विजेचा शॉक लागून सक्षमचा मृत्यू झाल्याचे पोलिसांचे म्हणणे आहे.  या प्रकरणी सक्षमच्या कुटुंबीयांच्या तक्रारीवरून जिमचालकाविरुद्ध गुन्हा दाखल करण्यात आला आहे. पोलिसांनी सांगितले की, आरोपी जिम ऑपरेटर अनुभव दुग्गल याला निष्काळजीपणामुळे मृत्यूच्या कलमांतर्गत गुन्हा दाखल करून अटक करण्यात आली आहे. याप्रकरणी कारवाई करण्यात येत आहे.