Dr. Gauri Garje Death Case : भाजप नेत्या आणि राज्याच्या पर्यावरण मंत्री पंकजा मुंडे यांचे स्वीय सहाय्यक अनंत गर्जे यांची पत्नी डॅा. गौरी गर्जे पालवे यांनी आत्महत्या केल्याची धक्कादायक घटना नुकतीच घडली होती. या घटनेनंतर राज्यात एकच खळबळ उडाली आहे. गौरी यांच्या मृत्यू प्रकरणी पती अनंत गर्जेला पोलिसांना अटक केली आहे. कोर्टाने अनंतला २७ नोव्हेंबरपर्यंत पोलीस कोठडी सुनावली होती. काल त्याची पोलीस कोठडी संपली असून, कोर्टात झालेल्या सुनावणीत पोलिसांनी या प्रकरणी माहिती सादर केल्यानंतर आरोपी अनंत गर्जेच्या पोलीस कोठडीत २ डिसेंबरपर्यंत वाढ करण्यात आली आहे.

अनंत गर्जेच्या अटकेनंतर गौरी यांच्या कुटुंबीयांनी गर्जे कुटुंबावर गंभीर आरोप करत तिची आत्महत्या नसून हत्या करण्यात आल्याचा दावा केला होता. आता या प्रकरणात नवीनवी माहिती समोर येत आहे. प्राथमिक माहितीनुसार, अनंत गर्जे यांचे अफेअर होते. या कारणामुळे सातत्याने वाद होत असल्याने गौरी यांनी वरळी येथील राहत्या घरी गळफास घेत आपल्या आयुष्याची अखेर केली. मात्र, आता पोलिसांनी कोर्टात दिलेल्या माहितीनुसार आता या प्रकरणाला वेगळे वळण मिळाले आहे.

‘तो’ संशय बळावला

मयत गौरी गर्जे पालवे यांच्या मृत्यूनंतर त्यांच्या पोस्टमार्टेम रिपोर्टमध्ये शरीरावर जखमा आढळल्या आहेत. तसेच अनंत गर्जे याच्याही शरीरावर जखमा आढळल्याने गौरी यांचा मृत्यू होण्याचापूर्वी दोघांमध्ये झटापट तर नव्हती झाली ना? असा संशय बळावला आहे. याशिवाय घटनेपूर्वी दोघांमध्ये झालेल्या संभाषणाचे रेकॉर्डिंगही पोलिसांच्या हाती लागले असून त्याची सखोल तपासणी पोलीस करत आहेत. त्यामुळे गौरी यांची आत्महत्या की हत्या? हे पोलिसांच्या सखोल तपासअंती स्पष्ट होणार आहे.या प्रकरणात आरोपी करण्यात आलेल्या अनंतच्या दोघा भावंडांचा थांगपत्ता पोलिसांना लागला नसून पोलीस त्यांचा शोध घेत आहेत. कोर्टात सरकारी वकीलांनी युक्तिवाद करताना अनंत गर्जेच्या पोलीस कोठडीत वाढ करण्याची आवश्यकता असल्याचे सांगितले. त्यानंतर अनंतच्या पोलीस कोठडीत वाढ करण्यात आली आहे. पण गौरी यांच्या मृत्यू प्रकरणात अनंत आणि मयत गौरी यांच्या शरीरावर आढळलेल्या जखमा यामुळे प्रकरणात नवा ट्विस्ट निर्माण झाला आहे. त्यामुळे पोलिसांच्या तपासात या मृत्यू प्रकरणात आणखी कोणती धक्कादायक माहिती समोर येते हे पाहवे लागणार आहे.

नेमकं काय घडलं?

भाजप नेत्या पंकजा मुंडे यांचे स्वीय सहाय्यक अनंत गर्जे यांच्या पत्नी डॉ. गौरी पालवे गर्जे यांनी काही दिवसांपूर्वी आत्महत्या केल्याची घटना उघडकीस आली होती. त्यांच्या आत्महत्या प्रकरणाने राज्यभरात एकच खळबळ उडाली होती. कुटुंबीयांनी गौरी यांचा मृत्यू आत्महत्या नसून हत्या झाल्याचा आरोप केला आहे. त्यानंतर या प्रकरणाला कलाटणी मिळाली असून पोलीस या प्रकरणाचा सखोल तपास करीत असून पती अनंत गर्जे याच्यासह दीर आणि नणंदेवर गुन्हा दाखल करण्यात आला आहे.