Shivraj Motegaonkar : देशभरात खळबळ उडवून देणाऱ्या नीट पेपरफुटी प्रकरणात आता आणखी एक धक्कादायक वळण समोर आले आहे. या बहुचर्चित प्रकरणाचा तपास करणाऱ्या सीबीआयने आरोपी शिवराज मोटेगावकर विरोधातील पुरावे अधिक मजबूत करण्यासाठी मोठी चाल खेळली आहे. विशेष म्हणजे, या प्रकरणात सीबीआयला सर्वात महत्त्वाचा साक्षीदार थेट मोटेगावकरच्या घरातूनच मिळाल्याची माहिती समोर आली आहे.

विश्वसनीय सूत्रांच्या माहितीनुसार, मोटेगावकर यांचा अल्पवयीन मुलगा ज्याने ५ मे रोजी नीट परीक्षा दिली होती, त्याला या प्रकरणातील प्रमुख साक्षीदार बनवण्याची तयारी सुरू आहे. या घडामोडीमुळे मोटेगावकर यांच्या अडचणींमध्ये मोठी वाढ होण्याची शक्यता व्यक्त केली जात आहे.

सीबीआयने पुण्यात मोटेगावकरच्‍या मुलाची कसुन चौकशी केली. या चौकशीदरम्यान त्याने दिलेल्या जबाबामुळे तपासाला नवी दिशा मिळाल्याचे सांगितले जात आहे.

मुलाच्या म्हणण्यानुसार, नीट परीक्षेच्या सुमारे दहा दिवस आधीच फिजिक्स, केमिस्ट्री आणि बायोलॉजी या तिन्ही विषयांच्या प्रश्नपत्रिका त्याला उपलब्ध करून देण्यात आल्या होत्या.

या कथित कबुलीजबाबामुळे पेपरफुटी रॅकेट परीक्षेच्या बराच काळ आधीपासून सक्रिय असल्याचा संशय अधिक बळकट झाला आहे. दरम्‍यान, सीबीआयचौकशीत शिवराज मोटेगावकरने आपल्या मुलाला नीट परीक्षेपूर्वी प्रश्नपत्रिका मिळाल्याची बाब मान्य केल्याची माहिती सूत्रांकडून मिळत आहे.

याबाबत अधिकृतरीत्या कोणतीही पुष्टी करण्यात आलेली नसली तरी मुलाला डॉक्टर बनवण्यासाठी पेपर विकत घेतल्याचा तपास यंत्रणांचा संशय अधिक गडद झाला आहे.