Shivner Bhushan Award 2026 – जुन्नर तालुक्यातील विविध क्षेत्रांत उल्लेखनीय कार्य करून तालुक्याच्या शिरपेचात मानाचा तुरा खोवणार्या मान्यवरांना छत्रपती शिवाजी महाराज यांच्या जयंती महोत्सवानिमित्त शासनमान्य ‘शिवनेर भूषण’ पुरस्काराने सन्मानित करण्यात येणार असल्याची माहिती जुन्नरचे आमदार शरद सोनवणे यांनी दिली. जुन्नर येथे आयोजित पत्रकार परिषदेत त्यांनी यंदाच्या पुरस्कारांची घोषणा केली. दरवर्षी शिवजयंतीचे औचित्य साधून शासनाकडून ‘शिवनेर भूषण’ पुरस्कार प्रदान केले जातात. यंदाही गुरुवारी (दि. 19) किल्ले शिवनेरी येथे शिवजयंती सोहळ्यानिमित्त राज्याचे मुख्यमंत्री देवेंद्र फडणवीस, उपमुख्यमंत्री सुनेत्रा पवार तसेच एकनाथ शिंदे यांच्या हस्ते व अन्य मंत्रिगणांच्या प्रमुख उपस्थितीत पुरस्कारांचे वितरण होणार आहे. यंदाच्या ‘शिवनेर भूषण’ पुरस्कारासाठी पुढील मान्यवरांची निवड करण्यात आली आहे – पिंपळवंडी येथील सुकन्या श्रुतिका प्रवीण ताथवडे यांची भारतीय नौदलात उपलेफ्टनंट पदावर निवड झाल्याबद्दल गौरव करण्यात येणार आहे. वारूळवाडी येथील सुपुत्र अजिंक्य संजय मेहेर यांची मद्रास ट्वेंटी रेजिमेंटमध्ये लेफ्टनंट पदावर निवड झाल्याबद्दल सन्मान होणार आहे. खारखर येथील टाटा कॅन्सर रुग्णालयाचे विभाग प्रमुख डॉ. विनोद सीताराम हांडे यांना वैद्यकीय क्षेत्रातील योगदानाबद्दल गौरविण्यात येणार आहे. जुन्नर तालुका पंचायत समितीचे अकरा वर्षे सभापती राहिलेले शिवाजीराव नामदेव खैरे यांना राजकीय व सामाजिक क्षेत्रातील कार्याबद्दल पुरस्कार प्रदान करण्यात येणार आहे. तसेच कृषी क्षेत्रात मोलाचे योगदान देणारे प्रगतशील ऊस उत्पादक शेतकरी स्व. पंकज शिवाजी वामन यांना मरणोत्तर पुरस्काराने सन्मानित करण्यात येणार आहे. शिवजयंती सोहळ्यात या सर्व मान्यवरांचा गौरव करण्यात येणार असून तालुक्यात उत्साहाचे वातावरण निर्माण झाले आहे.
