Shivendrasinhraje Bhosale – बचत, काटकसर आणि नेटके नियोजन याद्वारे अजिंक्यतारा साखर कारखान्याने प्रगतीचा आलेख चढता ठेवला आहे. संस्थेची प्रगती आणि सभासद- शेतकर्‍यांची आर्थिक उन्नती हे स्व. भाऊसाहेब महाराजांचे स्वप्न साध्य झाले असून सभासद, शेतकरी आणि कामगार यांच्या अनमोल सहकार्यामुळेच कारखाना प्रगतीपथावर पोहचला आहे, असे प्रतिपादन कारखान्याचे मार्गदर्शक संचालक तथा राज्याचे सार्वजनिक बांधकाम मंत्री शिवेंद्रसिंहराजे भोसले यांनी केले.

दरम्यान, नेहमीप्रमाणे आगामी गळीत हंगामातही आपला सर्वच्या सर्व ऊस अजिंक्यतारा कारखान्याला घालून आपले सहकार्य कायम ठेवावे, असे आवाहन त्यांनी सभासद- शेतकर्‍यांना केले. शेंद्रे, ता. सातारा येथील स्व. अभयसिंहराजे भोसले सांस्कृतिक भवन येथे अजिंक्यतारा सहकारी साखर कारखान्याची 44 वी वार्षिक सर्वसाधारण सभा खेळीमेळीच्या वातावरणात, मोठ्या उत्साहात झाली.

यावेळी कारखान्याचा बॉयलर अग्निप्रदीपन समारंभ आणि गव्हाणीत ऊस मोळी टाकून कारखान्याच्या गळीत हंगामाचा शुभारंभ जेष्ठ सभासदांच्या हस्ते करण्यात आला. याप्रसंगी ना. शिवेंद्रसिंहराजे बोलत होते. यावेळी कारखान्याचे चेअरमन यशवंत साळुंखे, व्हा. चेअरमन नामदेव सावंत, कार्यकारी संचालक जिवाजी मोहिते, सर्व आजी, माजी संचालक, लालासाहेब पवार, जि. प.चे माजी उपाध्यक्ष चंद्रकांत जाधव, माजी सभापती सतीश चव्हाण,

किरण साबळे पाटील, वनिता गोरे, विद्यमान सदस्य अजित साळुंखे, पूजा मोरे, जिल्हा बँकेचे संचालक सुरेश सावंत, कांचन साळुंखे आदी मान्यवरांची प्रमुख उपस्थिती होती. कार्यकारी संचालक मोहिते यांनी सभेपुढील विषयांचे वाचन केले. सभासदांनी हात वर करून एकमताने सर्व विषयांना मंजुरी दिली. यावेळी विक्रमी उत्पादन घेणार्‍या तसेच कारखान्याला विक्रमी ऊस पुरवठा करणार्‍या विविध गावातील शेतकर्‍यांचा रोख पारितोषिक, सन्मानचिन्ह देऊन सन्मान करण्यात आला.

ना. शिवेंद्रसिंहराजे म्हणाले. कमीत कमी कालावधीत जास्तीत जास्त गाळप करून शेतकर्‍यांना जास्तीत जास्त दर देण्याचा प्रयत्न सातत्याने केला जात आहे. हे दिवस सभासद आणि कामगारांच्या अनमोल सहकार्यामुळे दिसत आहेत हे कोणीही विसरणार नाही. ही संस्था माझी नाही तर आपल्या सर्वांची आहे. याची जाणीव ठेवूनच आणि याच भावनेतून संचालक मंडळ नेहमीच कार्यरत आहे. इथेनॉल निर्मितीसह आता कारखाना सीबीजी प्रकल्प उभारणार आहे.

यामुळे कारखान्याच्या उत्पन्नात वाढ होईल आणि त्याचा फायदा उच्चतम दर देण्यासाठी होणार आहे. उद्या कदाचित आपण नसू पण, आपली संस्था तहहयात इथेच असणार आहे. त्यामुळे आपली संस्था टिकली पाहिजे, वाढली पाहिजे यासाठी सर्वानीच आपला ऊस इतर कोणत्याही कारखान्याला न देता आपल्याच कारखान्याला देऊन सहकार्य करावे, असे आवाहन ना. शिवेंद्रसिंहराजे यांनी केले.