Samruddhi Highway accident : समृद्धी महामार्गावर भीषण अपघाताची घटना घडली आहे. शिवसेना शिंदे पक्षाचे नेते केंद्रीय आरोग्य राज्यमंत्री प्रतापराव जाधव यांच्या कारचा भीषण अपघात झाला आहे. वाशिम जिल्ह्यातील मालेगावजवळ ही अपघाताची घटना घडली आहे. कारने ट्रकला जोरदार धडक दिली, त्यातून हा अपघात झाला आहे. या अपघातात तीन जण गंभीर जखमी झाले असून त्यांच्यावर रुग्णालयात उपचार सुरू आहेत. सुदैवाने अपघात झाला तेव्हा केंद्रीय आरोग्य राज्यमंत्री प्रतापराव जाधव हे कारमध्ये नव्हते. त्यामुळे पुढे घडणारा मोठा अनर्थ टळला आहे. या अपघाताचा पोलीस तपास करत आहेत. नेमकं काय घडलं? मध्यरात्री केंद्रीय राज्यमंत्री प्रतापराव जाधव यांना नागपूर विमानतळावर सोडल्यानंतर कारमधून त्यांचे अंगरक्षक आणि सहकारी मेहकरच्या दिशेने जात असताना अपघात झाला. कारने ट्रकला जोरदार धडक दिली आणि अपघातात कारचा चक्काचूर झाला. या अपघातात जखमी झालेल्या तिघांना वाशिम येथील एका खाजगी रुग्णालयात उपचारासाठी दाखल करण्यात आले आहे. त्यांच्यावर उपचार सुरू असून त्यांची प्रकृती चिंताजनक आहे. या अपघाताची माहिती मिळताच मंत्री प्रतापराव जाधव यांना त्यांचा नियोजित दौरा रद्द केला आहे. ते मुंबईवरून मेहेकरला परत आले. त्यांनी जखमींची भेट घेत त्यांच्या प्रकृतीबाबत विचारपूस केली. अपघात नेमका कशामुळे झाला? या अपघाताबाबत पोलिसांनी दिलेल्या माहितीनुसार, समृद्धी महामार्गावर माळेगावजवळ मंत्री प्रतापराव जाधव यांची कार नागपुरवरून मेहेकरच्या दिशेने जात होती. त्यावेळी मुंबईवरून आलेल्या एका ट्रकने महामार्गावर अचानक युटर्न घेतला. अचानक घडलेल्या या घटनेमुळे चालकाचे कारवरील ताबा सुटला आणि कारने ट्रकला जोरदार धडक देत भीषण अपघाताची घटना घडली. हेही वाचा : शेअर बाजाराची सुरुवात स्थिर ! सेन्सेक्स ३२ अंकांनी वधारला ; निफ्टीने २६,०५८ ओलांडले
