पुरवठा निरीक्षक निलेश घोडके यांचा जनहित कारभार
सविंदणे – शिरूर तहसील कार्यालयातील पुरवठा विभागात अर्ज दाखल केल्यानंतर वर्षभराहून अधिक काळ रेशनकार्ड नागरिकांना मिळत नव्हते. त्यामुळे नागरिकांना वारंवार पुरवठा विभागात हेलपाटे मारावे लागत होते. याविषयी दैनिक “प्रभात’ने आवाज उठवला होता.

पुरवठा कार्यालयात निरीक्षक म्हणून निलेश घोडके यांनी चार्ज स्वीकारला. त्यांनी तहसीलदार बाळासाहेब म्हस्के, नायब तहसीलदार प्रकाश मुसळे यांच्या मार्गदर्शनाखाली शासकीय कामकाजापेक्षा जास्त वेळ देत दोन महिन्यांत दोन हजारांपेक्षा जास्त रेशनकार्ड तयार करून वितरित केले आहेत. यांच्या कार्यतत्परतेबद्दल नागरिकांना सुखद अनुभव येत आहे.

शिधापत्रिकेची अडचण असो, स्वस्त धान्य न मिळण्यावाबतची अडचण असो किंवा त्यांच्या विभागाशी संबंधित नागरिकांची कुठलीही अडचण असो. त्याची शहानिशा करून ती कामे तत्परतेने मार्गी कशी लागतील व शिधापत्रिकाधारकांच्या अडचणी कशा दूर होतील, असे कार्यतत्पर व जलद काम घोडके हे करीत आहेत. रुग्णालयात उपचार घेणाऱ्या नागरिकांना ते त्वरित रेशनकार्ड उपलब्ध करून देत आहेत.

मागील दोन वर्षांपासून शिधापत्रिका ऑनलाइन वेळेवर होत नव्हते. त्यात सुसुत्रता आणून जलदगतीने रेशनकार्ड ऑनलाइन होत आहेत. त्यामुळे पुरवठा विभागातील गर्दी कमी होऊ लागली आहे. अनेक नागरिकांनी मनापासून घोडके यांचे आभार मानत घोडके यांच्यासारखे कार्यतत्पर अधिकारी इतरही शासकीय कार्यालयात असल्यास नागरिकांची शासकीय कामे न रखडता व त्वरेने मार्गी लागतील, असा विश्‍वास सर्वसामान्यांनी व्यक्‍त केला.

पारनेरच्या एजंटाची चौकशी करा
तहसील कार्यालयाच्या आजूबाजूला ऑफिस थाटत ऑनलाइन रेशनकार्ड करण्यासाठी तब्बल पाचशे रुपये आकारले जात आहेत. त्यासाठी कोणत्या अधिकाऱ्याचा आयडी वापरला जातोय, याची चौकशी होणे गरजेचे आहे. शिरूर तहसील कार्यालयात पारनेर तालुक्‍यातील एक एजंट ठाण मांडत नागरिकांना मोठ्या प्रमाणात लुटत असल्याची चर्चा जोर धरू लागली आहे. तसेच संजय गांधी योजनेत बोगस प्रकरणे बनवून तलाठी, मंडल अधिकारी यांच्या डुप्लीकेट सह्या, शिक्‍के तयार केल्याप्रकरणी तक्रार करूनही अद्याप कारवाई झाली नाही. याकडे शिरूर तहसीलदारांनी लक्ष देणे गरजेचे आहे.