शिरूर : शिवसेना उद्धव बाळासाहेब ठाकरे पक्षाच्या वतीने शिरूर तहसील कार्यालयासमोर आमदार गोपीचंद पडळकर यांच्या वादग्रस्त वक्तव्याच्या निषेधार्थ तीव्र आंदोलन करण्यात आले. माजी मुख्यमंत्री आणि शिवसेना पक्षप्रमुख उद्धव ठाकरे यांच्याविषयी पडळकर यांनी केलेल्या आक्षेपार्ह विधानाने शिवसैनिकांसह महाराष्ट्रातील मराठी जनतेच्या भावना दुखावल्या गेल्या. या पार्श्वभूमीवर पुणे जिल्हा संपर्कप्रमुख आमदार सचिन आहिर, ज्येष्ठ नेते रविंद्र मिर्लेकर आणि जिल्हाप्रमुख अशोक खांडेभराड यांच्या मार्गदर्शनाखाली हे आंदोलन पार पडले.

आंदोलनादरम्यान संतप्त शिवसैनिकांनी जोरदार घोषणाबाजी करत पडळकर यांच्या वक्तव्याचा तीव्र निषेध व्यक्त केला. उपतालुकाप्रमुख अनिल पवार, शेतकरी सेना तालुकाप्रमुख योगेश ओव्हाळ पाटील, तालुका सल्लागार संतोष काळे, ज्येष्ठ शिवसैनिक खुशालबापू गाडे, महिला आघाडीच्या संगिता शिंदे, ग्राहक संरक्षणचे कैलास पवार, माजी चेअरमन तात्या धावडे, माजी सरपंच बंडूसेठ पवार, उपाध्यक्ष साहेबराव कारंडे, अजित पवार, दौलत पवार, प्रताप चव्हाण, सुनिल चव्हाण, संतोष चौधरी, संदीप पवार, ग्राहक संरक्षणचे सुनिल खळदकर यांच्यासह शिवसेनेच्या अंगीकृत संघटना, महिला आघाडीच्या कार्यकर्त्या आणि मोठ्या संख्येने शिवसैनिक उपस्थित होते.

आंदोलनात बोलताना नेत्यांनी ठामपणे सांगितले, “शिवसेना आणि मराठी माणसाच्या अस्मितेला दुखावणाऱ्याला महाराष्ट्रात थारा नाही. पडळकर यांनी केलेली तुलना छत्रपती शिवाजी महाराज आणि मराठी जनतेचा अपमान आहे. अशा आक्षेपार्ह वक्तव्यांचा निषेध करणे ही शिवसैनिकांची खरी जबाबदारी आहे.” शिस्तबद्ध आणि ठाम पद्धतीने पार पडलेले हे आंदोलन इतर राजकीय पक्षांसाठीही प्रेरणादायी ठरले. आंदोलनात सहभागी शिवसैनिकांच्या चेहऱ्यावर आक्रोशापेक्षा स्वाभिमानाचा भाव दिसून आला.