Shirur News – आंतरराष्ट्रीय स्तरावरील युद्धजन्य परिस्थितीच्या पार्श्वभूमीवर शिरूरचे तहसीलदार बाळासाहेब म्हस्के यांनी तालुक्यातील एलपीजी गॅस आणि इंधन साठ्याचा सविस्तर आढावा घेतला आहे. महसूल प्रशासनाने गॅस वितरक आणि पुरवठा विभागाच्या अधिकाऱ्यांची तातडीची बैठक घेऊन सद्यस्थितीची माहिती घेतली. तालुक्यात गॅसचा पुरेसा साठा उपलब्ध असून पुरवठा साखळी सुरळीत असल्याचे प्रशासनाकडून स्पष्ट करण्यात आले आहे. बैठकीत तहसीलदार म्हस्के यांनी वितरकांना साठ्याची अद्ययावत माहिती नियमितपणे देण्याचे निर्देश दिले. नागरिकांनी कोणत्याही प्रकारच्या अफवांना बळी पडू नये किंवा भीतीपोटी अनावश्यक साठेबाजी करू नये, असे आवाहन प्रशासनाने केले आहे. पुरवठा नायब तहसीलदार सदाशिव व्हणमाने यांनी पुरवठा यंत्रणा सज्ज असल्याचे सांगितले. या सतर्कतेमुळे नागरिकांना जीवनावश्यक वस्तूंच्या उपलब्धतेबाबत दिलासा मिळाला असून, प्रशासनाने संभाव्य संकटाच्या नियोजनासाठी कंबर कसली आहे. घरगुती ग्राहकांच्या गरजांना प्राधान्य तहसीलदारांनी बैठकीत घरगुती ग्राहकांच्या गरजा प्राधान्याने पूर्ण करण्याच्या सूचना दिल्या आहेत. ग्रामीण व शहरी भागातील स्वयंपाकघरांवर परिणाम होऊ नये, यासाठी वितरकांनी सुसूत्र नियोजन करावे. तसेच हॉटेल, खानावळी आणि इतर व्यावसायिक घटकांनाही गरजेनुसार गॅस उपलब्ध करून देण्याबाबत यंत्रणेला सूचित करण्यात आले आहे. पॅनिक बुकिंग टाळण्याचे आवाहन युद्धामुळे तुटवडा निर्माण होणार असल्याच्या अफवा पसरत असल्याचे नायब तहसीलदार सदाशिव व्हणमाने यांनी सांगितले. तालुक्यात पुरेसा साठा असल्याने नागरिकांनी घाबरून जाऊन अनावश्यक पॅनिक बुकिंग करू नये आणि गरजेनुसारच सिलिंडरची मागणी करावी, जेणेकरून कृत्रिम टंचाई निर्माण होणार नाही. “संकटकाळात परिस्थितीचा गैरफायदा घेऊन गॅस सिलिंडर अवैध साठेबाजी किंवा जादा दराने विक्री करणाऱ्यांवर कठोर भूमिका घेतली आहे. जर कोणी काळाबाजार किंवा वितरण साखळीत अडथळा निर्माण करताना आढळले, तर त्यांच्यावर जीवनावश्यक वस्तू कायद्यांतर्गत कठोर कारवाई करण्यात येईल.” – बाळासाहेब म्हस्के, तहसीलदार, शिरूर
