प्रभात वृत्तसेवा शिरूर – गणेगाव दुमाला (ता. शिरूर) येथील म्हसोबावाडी जिल्हा परिषद प्राथमिक शाळेच्या मालकीच्या जागेवर एका शेतकऱ्याने बेकायदेशीरपणे नांगरणी करून अतिक्रमण केल्याची घटना समोर आली आहे. या प्रकारामुळे शाळेच्या पिण्याच्या पाण्याचा बोअर निकामी झाला असून विद्यार्थ्यांना शाळेत जाण्याचा एकमेव रस्ता कंपाउंड टाकून बंद करण्यात आला आहे. या गंभीर अतिक्रमणामुळे परिसरात तणावाचे वातावरण असून, विद्यार्थ्यांच्या शिक्षणाचा प्रश्न ऐरणीवर आला आहे.संबंधित व्यक्तीने शालेय परिसरातील झाडे तोडून कंपाउंडचेही नुकसान केल्याची तक्रार समोर आली आहे. या कृत्यामुळे शालेय व्यवस्थापन समिती, पालक आणि ग्रामस्थ अत्यंत आक्रमक झाले असून त्यांनी शिरूर पोलीस ठाण्यात लेखी निवेदन देऊन कारवाईची मागणी केली आहे. रस्ता बंद झाल्यामुळे मुले वर्गात बसू शकत नसल्याने पालकांनी तीव्र संताप व्यक्त केला आहे. वारंवार मागणी करूनही अद्याप ठोस कारवाई न झाल्याने प्रशासनाच्या भूमिकेवर प्रश्नचिन्ह उपस्थित केले जात आहे.प्रशासनाने तातडीने हस्तक्षेप करून हे अतिक्रमण न हटवल्यास २ जानेवारीपासून तहसील कार्यालयासमोर विद्यार्थ्यांना घेऊन शाळा भरवण्याचा निर्णय ग्रामस्थांनी घेतला आहे. शाळेची जागा ही सार्वजनिक मालमत्ता असून मुलांच्या भविष्याशी खेळणाऱ्यांवर कठोर गुन्हा दाखल करावा, अशी मागणी होत आहे. आता शिक्षणविभाग, महसूल आणि पोलीस प्रशासन यावर काय पावले उचलणार, याकडे सर्वांचे लक्ष लागले आहे.
