Shirur Crime – शिरूर शहरातील बहुचर्चित मार्वल इन लॉजिंगमध्ये नोकरीचे आमिष दाखवून तरुणीवर अत्याचार केल्याच्या गंभीर प्रकरणानंतर व अमली पदार्थ सापडल्यामुळे लॉजिंगच्या कारभारावर संशयाचे सावट गडद झाले आहे. तरुणीला आठ जणांनी नशा आणणारी पांढऱ्या रंगाची पावडर देऊन अत्याचार केला होता. सर्वांनी लॉजिंगमध्ये राहण्याची परवानगी कशी मिळवली,

ही पावडर नेमकी कुठून आली, लॉजिंगमध्ये तिला कोणी आणली, याचा तपास करण्याची मागणी होत आहे. या कारवाईतून लॉज मालक निसटल्याची चर्चा सुरू असून तोडपाणीवर खमंग सुरात फोडणी मिळत आहे. विशेष म्हणजे, याच लॉजिंगमध्ये काही दिवसांपूर्वी मेफेड्रॉनसदृश अमली पदार्थ जप्त केल्याची पोलिस कारवाई झाली होती.

त्यानंतर अवघ्या काही दिवसांत नशेची पावडर देऊन तरुणीवर अत्याचार केल्याचा आरोप समोर आल्याने दोन्ही घटनांचा काही संबंध आहे का, याचाही तपास होणे आवश्यक आहे. अत्याचाराच्या तक्रारीत पांढऱ्या रंगाची नशा आणणारी पावडर दिल्याचे नमूद आहे. ही पावडर कोणत्या अमली पदार्थाची होती, हे फॉरेन्सिक तपासणीतून स्पष्ट होणे अपेक्षित आहे. नागरिकांमध्ये मात्र, ती ‘एमडीसदृश’ असल्याची चर्चा आहे.

त्यामुळे पोलिसांनी नमुना तपासणीबरोबरच पदार्थाचा स्रोत, पुरवठादार, लॉजिंगपर्यंत तो कसा पोहोचला, याचा तपास करावा, अशी मागणी होत आहे. घटनाक्रम स्पष्ट करण्यासाठी लॉजचे सीसीटीव्ही फुटेज, प्रवेश-निर्गमन नोंदी, रजिस्टर तपासणे महत्त्वाचे ठरणार आहे. खोली कोणी बुक केली, तरुणी लॉजमध्ये कोणासोबत आली, तिची नोंद कोणत्या नावाने झाली, त्यावेळी कोण कोण उपस्थित होते, संबंधित वाहन कोणाचे होते, याची माहिती तपासातून समोर येणे गरजेचे आहे.

मोठी बिदागी, कारवाईस टाळाटाळ
लॉजिंगमध्ये अमली पदार्थासंदर्भात कारवाई झाल्यानंतरही लॉजिंग मालकाच्या भूमिकेबाबत नागरिकांकडून प्रश्न उपस्थित होत आहेत. मालकाला असूनही अद्यापपर्यंत आरोपी केले नाही. मालकाला आरोपी न करण्यासाठी एका पोलीस कर्मचाऱ्याने मोठी रक्कम उकळली आहे अशी खात्रीलायक सूत्रांची माहिती आहे. त्यामुळेच मालकाला आरोपी केला जात नसल्याची चर्चा होत आहे. पोलीस निरीक्षक विनोद पाटील हे केवळ मालकाला आरोपी करणार असे म्हणत असून अद्यापपर्यंत या मालकाला आरोपी केले नाही. त्यामुळे संशय अधिक बळावला आहे.