Shirur Crime – राज्यभरात युरियाचा तुटवडा असताना, त्याचा फायदा घेत एका गुजराती भामट्याने हिवरे कुंभार (ता. शिरूर) येथील युरिया पुरवठादाराची सात लाख अठरा हजार रुपयांची फसवणूक केली आहे. स्वतःची युरिया कंपनी असल्याचे भासवून बनावट कागदपत्रे आणि फोटोच्या आधारे हा आर्थिक गंडा घातल्याने परिसरात खळबळ उडाली आहे. मिळालेल्या माहितीनुसार, हिवरे कुंभार येथील प्रसाद तांबे हे एका कंपनीमार्फत युरिया पुरवण्याचे काम करतात. युरियाची कमतरता असल्याने ते इंटरनेटवर नवीन पुरवठादार शोधत असताना अहमदाबाद येथील भारवाड संजय माफाभाई हा त्यांच्या संपर्कात आला. माफाभाई याने विश्वासाने तांबे यांना कागदपत्रे पाठवून खताचे निम्मे पैसे आधी भरण्यास सांगितले. तांबे यांनी विश्वासाने सहा लाख पन्नास हजार रुपये त्याच्या खात्यात पाठवले आणि त्यानंतर दोन दिवसांनी गाडी भाड्यासाठी आणखी अडुसष्ट हजार रुपये दिले.पैसे मिळाल्यानंतर आरोपीने तांबे यांना एका गाडीचा आणि चालकाचा नंबर दिला. मात्र, तांबे यांनी संपर्क साधला असता तो नंबर बनावट असल्याचे उघड झाले. बरेच दिवस उलटूनही खत न मिळाल्याने आणि माफाभाई उडवाउडवीची उत्तरे देऊ लागल्याने आपली फसवणूक झाल्याचे तांबे यांच्या लक्षात आले. याप्रकरणी प्रसाद आनंदा तांबे (वय ३२, मूळ रा. हिवरे कुंभार) यांनी शिक्रापूर पोलिसात फिर्याद दिली आहे. पोलिसांनी भारवाड संजय माफाभाई (रा. अहमदाबाद, गुजरात) याच्या विरोधात गुन्हा दाखल केला असून, पोलीस निरीक्षक दीपरतन गायकवाड यांच्या मार्गदर्शनाखाली पुढील तपास सुरू आहे.
