Shikrapur News : पोलीस म्हणजे केवळ कायद्याची अंमलबजावणी करणारे अधिकारी नसून, संकटात धावून जाणारे माणुसकीचे खरे रक्षकही आहेत, याचा प्रत्यय शिक्रापूर (Shikrapur News) येथे नुकताच आला आहे. शिक्रापूर पोलीस ठाण्याचे पोलीस हवालदार मिलिंद देवरे यांनी दाखविलेल्या संवेदनशीलतेमुळे एका तीन वर्षीय निष्पाप बालिकेचे संभाव्य मोठे संकट टळले असून, त्यांच्या या देवदूतासारख्या कार्याचे सध्या सर्व स्तरातून कौतुक होत आहे.

ही घटना शिक्रापूर (Shikrapur News) येथील चाकण चौक परिसरात रात्री सुमारे ११ वाजण्याच्या सुमारास घडली. एक व्यक्ती एका तीन वर्षांच्या बालिकेला सोबत घेऊन अत्यंत मद्यधुंद अवस्थेत रस्त्यालगत पडलेली असल्याचे स्थानिक नागरिक विनोद जाधव, राजू दान आणि राधेश्याम आहेर यांच्या निदर्शनास आले. इतक्या रात्री ती चिमुकली अत्यंत भयभीत अवस्थेत तिथे उभी असल्याचे पाहून या नागरिकांनी तात्काळ शिक्रापूर पोलीस ठाण्याचे पोलीस हवालदार मिलिंद देवरे यांच्याशी संपर्क साधून या घटनेची माहिती दिली.

माहिती मिळताच पोलीस हवालदार मिलिंद देवरे यांनी क्षणाचाही विलंब न करता तात्काळ घटनास्थळी धाव घेतली. त्यांनी तिथे पोहोचल्यावर प्रथम त्या अत्यंत घाबरलेल्या बालिकेला सुरक्षितपणे आणि प्रेमाने जवळ घेत तिला (Shikrapur News) धीर दिला, ज्यामुळे तिचा रडण्याचा वेग कमी झाला. त्यानंतर देवरे यांनी रस्त्यावर शुद्ध हरपून पडलेल्या त्या मद्यधुंद व्यक्तीच्या खिशाची तपासणी केली. सुदैवाने त्याच्या खिशात असलेल्या कागदपत्रांमधून पोलिसांना एक मोबाईल क्रमांक मिळून आला. देवरे यांनी वेळ न दवडता त्या क्रमांकावर कॉल करून संबंधित कुटुंबीयांशी संपर्क साधला आणि घडलेल्या प्रकाराची कल्पना दिली.

घटनेची माहिती मिळताच काही वेळातच बालिकेचे नातेवाईक घाबरलेल्या अवस्थेत घटनास्थळी पोहोचले. पोलिसांनी योग्य ती खात्री करून त्या बालिकेला त्यांच्या सुरक्षित ताब्यात दिले. अत्यंत संवेदनशीलतेने केलेल्या या हस्तक्षेपामुळे एका निष्पाप बालिकेच्या जीविताला रात्रीच्या वेळी निर्माण होणारा संभाव्य धोका टळला.

आपल्या मुलीला सुखरूप पाहून तिच्या कुटुंबीयांना अश्रू अनावर झाले. त्यांनी अत्यंत भावूक होत, “मिलिंद देवरे हे आमच्यासाठी केवळ पोलीस कर्मचारी नसून, साक्षात पांडुरंग आहेत,” अशा शब्दांत आपल्या भावना व्यक्त करत पोलिसांचे मनापासून आभार मानले.

या घटनेमुळे खाकी वर्दीमागील माणुसकीचा आणि संवेदनशीलतेचा चेहरा पुन्हा एकदा समाजासमोर आला आहे. कायद्याचे कडक पालन करतानाच समाजातील प्रत्येक नागरिकाच्या सुरक्षिततेची आणि संवेदनांची जपणूक करणारे पोलीसच समाजाचा खरा आधार असल्याची भावना स्थानिक नागरिकांनी व्यक्त केली आहे.

पोलीस हवालदार मिलिंद देवरे यांच्या या माणुसकीपूर्ण कृतीमुळे संपूर्ण शिरूर तालुक्यात (Shikrapur News) त्यांच्या कर्तव्याचे कौतुक होत असून, सामाजिक बांधिलकी जपणाऱ्या अशा कर्तव्यदक्ष पोलिसाला नागरिकांनी मानाचा सलाम केला आहे.